Lucru ţi eara minduit di tuţ comentatorllii, liderllii a văsiliiloru membre ale Uniunii Europene deadiră statutlu di candidate la aderare tră Ucraina şi Republica Moldova, iara a treia văsilie ţi ari căftată, Georgia, fu ancurajată s’ducă ma largu reformele, tra s’poată s’amintă, tru ună dzuuă, idyiul statut. Participanţăllii la summitul a Consiliului European di Bruxelles salutară atea ţi u număsiră ca hiinda ună dzuuă istorică tră Uniune. Aesta ş-dişcllidi uşile tră nica trei ripubliţ ex-sovietiţi, dupu aproapea dauă dekenii di anda eara aprukeati statili baltiţi. Prezidenta a Comisiillei Europene, Ursula von der Leyen, cundille că tuti trei suntu, dija, parte a fumeaiillei europene.
“Nu poate s’aibă un semnu ma bun di nădie tră cetăţeañilli ditu Ucraina, Republica Moldova şi Georgia tru aestu greu kiro cutulburatu. Cadealihea că aesti văsilii lipseaşti tra ş-adară temili ninte tra s’treacă ma largu, la yinitoarea etapă ditu proţesul di aderare la Uniunea Europeană.”
Viţină cu Ucraina şi Republica Moldova şi ligată di atea ditu soni pritu comuniunea di limbă, cultură şi istorie, România easti prima sinfirisită di succeslu a reformilor pi cari va li facă proaspiţlli candidaţ. Prezidentulu Klaus Iohannis cundille că Guvernili di Chişinău şi Kiev lipseaşti să s’acaţă ntrăoară di lucru şi deadi asiguripseri că Republica Moldova va s’aibă di partea ali Românie tut agiutorul di cari ari ananghi. Klaus Iohannis “Minduescu că pritu aestă jgllioată putem să spunem că s-alăxi paradigma a lărdzearillei Uniunillei Europene, politica di extindeari lo diznău silă. Minduescu că Ucraina, Moldova şi Georgia tu arada a lor acăţară iruşi şi escu căndăsitu că tută lumea va s’acaţă salami cu lucurlu tra s’bagă tru practico reformele, proţedurile şi proiectele cari, dealihea, suntu nica anănghisiti tra s’facă yinitoarea ceapă.”
Prezidentul Iohannis fu protlu participantu la summit cari u asună, tra s-u hiritisească, omoloaga a lui ditu Republica Moldova, pro-occidentala Maia Sandu. Şi prezidintul a Consiliului European, belgianlu Charles Michel, pitricu un mesaj pe Twitter, tru română şi ucraineană, tru cari spuni, tru arada-lli, că “easti un moment istoric şi ună jgllioată di mari simasie pi calea a voastă cătră Uniunea Europeană”. Media internaţionale noteadză, ama, şi ună diclaraţie ma puţăn festivistă, ama ti diakihea exactă. Premierlu albanez, Edi Rama, ălli căndăsi pi ucraineni să “nu-şi facă iluzii” tu ligătură cu statutlu di candidat acordat di Uniunea Europeană, di itia că procesul di adiarare va s’hibă multu lung. “Macedonia di Nord easti candidat di 17 ani, cara s’nu alăthusiiu isapea, iara Albania di opt ani. Dimecu, ghini vinişi, Ucraina!” — feaţi şicaie Rama, anda agiumsi Bruxelles, tră summitul Uniunea Europeană-Balcanii ditu Ascăpitată.
Autoru: Leyla Cheamil
Armânipsearea: Taşcu Lala