Ripublica Moldova căftă aderarea la UE
Prezidenta-a Republicăllei Moldova, Maia Sandu, simnă căftarea di aderari la Uniunea Europeană.
România Internațional, 04.03.2022, 13:50
Ripublica Moldova caftă ufiţialu s’hibă aprukeată tru Uniunea Europeană. Nkisita, lugursită istorică tră Chişinău, yine tru un contextu regional andilicatu: polimlu ditu văsilia viţină Ucraina, criza arifugaţlor ucraineni agiumţă şi tru Republica Moldova, cum şi prezenţa a askeriloru ruse tru regiunea separatistă Transnistria nicontrolată di autorităţli di Chişinău. S’aduţemu aminti, ditu nkisită, că regiunea transnistreană işi, di facto, di sumu controlu a autorităţlor ţentrali di Chişinău tru 1992, după un conflictu armatu bitisitu cu suti di morţă şi tranşatu unăoară cu intervenţia-a askriloru ali Moscovă di partea-a separatiştilor. Tru 1999, la summitlu OSCE di Istanbul, Rusia, cumăndusită tu aţelu kiro di prezidintulu Boris Elţtru, ş’lo borgea tra ş-tragă askerili şi arsenalele. Diapoa, ma amănatu, dupu ţinţi añi, proţeslu fu tră totna curmatu, ruşllii hiinda şi tu aestu kiro aclo. Tru aestu contextu cu ahâtu ma multu andilicatu di invazia ditu Ucraina, prezidinta Maia Sandu simnă, gioi dicseară, căftarea di adiarari a Republicăllei Moldova la Uniunea Europeană. Ea diclară că autorităţli di Chişinău suntu ndreapti s’bagă tu practico aestu scupo naţional. Avem nadia s’asiguripsimu ti bărnurli yinitoari unu bănaticu ma bunu şi mai sigura – spusi Maia Sandu, uidisitu cu cari Ripublica Moldova lipseaşti s’aibă un imnaticu european limbidu:
“Simnăm căftarea di adiarare a Ripublicălleii Moldova la Uniunea Europeană. Hmiu ndrepţă s’adrămu tutu ţi easti ananghi tră băgarea tu lucru a aluştui ună ş’ună atumţea va nă spună catandisea şi vidim limbidu calea discllisă ta s’asiguripsiu a bărnurloru yinitoari unu bănaticu ma bunu, ma sigura. Băgarea tu practico a aluştui scupo easti borgea a noastră andicra di cetăţeni.”
Căftarea simnată di prezidintulu Maia Sandu, primlu ministru Natalia Gavriliţă şi prezidintulu a Parlamentului, Igor Grosu, va s’hibă dipusă Bruxelles tru dzălili ţi yinu. Ună idyea căftari dipusi şi Georgia, după ţi, luni, Ucraina, avea căftată ea işiş adirarea la Uniune. Tru gaeretea a llei ti adirare la bloclu comunitaru, Ripublica Moldova bagă besă tu agiutorlu a partenerlor europeni. Neise, apărătoru consecventu a indipendinţăllei şi integriatillei ali Ripublicăllei Moldova, Bucureştiul andrupaşti acutotalui imnaticlu a llei european. Tora ayoñea, prezidintulu român, Klaus Iohannis, diclară că “România ndrupaşti acutotalui integrarea Ucrainăllei, cum şi a Ripublicălleii Moldova şi Georgia tru Uniunea Europeană.” “Loclu aluştoru parteneri ali Uniunii easti tru fumealla europeană, a diapoa România va s’facă di căuli aţea turlie că aestu lucru s’agiungă averu” – cundille șeful statului. Căftarea ali Ripublică Moldova di adirare la Uniunea Europeană easti ună jgllioată istorică – spuni şi premierlu Nicolae Ciucă, cari da asiguripseri că România va s’lucreadză ma largu diadunu cu Chişinăulu, tra s’bagă tu practico aestu scupo.
Autor: Roxana Vasile
Armânipsearia: Taşcu Lala
