Reporteri fără sinuri – Raport tră libirtatea-a presăllei
România easti pi loclu 53 ditu 180 di văsilii tru clasamentul adratu, şi anlu aestu, di cunuscuta organizaţie tră apărarea libirtatillei tru presă Reporteri fără Sinuri.
Bogdan Matei, 04.05.2023, 17:38
Xikea di transparenţă a finanţarillei mass-media, maxus ditu fondurli publiţi catacum şi griutăţli a păzarillei aspardzi fiabilitatea informaţiilor şi pistipsearea tru media – cundilleadză raportul ti România ali organizaţie “Reporteri fără Sinuri. Autorlli pricunoscu că peisajlu mediatic românescu easti diversu şi pluralistu şi aduţi dininti teren fertil tră investigaţii di sinferu public vărtoasi.
Tru indiţili pi 2023 mutrinda libirtatea-a presăllei, România easti pi poziţia 53 ditu 180, tru creastire andicra di anlu tricutu, căndu eara pi loclu 56. Părţă importante ditu populaţia Româniillei minduescu s’pistipsească hăbărli false dimăndati nai multi ori di propaganda rusă, lucru ţi duţi la dezinteres şi nipistipseari andicra di jurnalismul di calitate — nica să spuni tru raportu.
Statlu român arămâni tu coada ali Europa tru ţi mutreaşti tiñisearea şi garantarea libertatillei şi siguranţăllei presăllei, cum şi accesul ningărditu la informaţii di sinferu public — declară, meslu ţi tricu, şi prezidenta ali organizație non-guvernamentală autohtonă ActiveWatch, Liana Ganea. Declaraţia-a llei yini după ţi işiş viţeprezidenta ali Comisie Europeană tră valori şi transparenţă, Vera Jourova, avea spusă că “situaţia presăllei ditu România nu easti dipu bună şi ari nica lucre ti adrari cu hăiri”. Una ditu protili probleme – spun aţeali dauă doamne – easti că mărli partidi politiţi finanţeadză nitransparentu presa, lucru ţi duţi la şubei rezonabile cum că agenda publică tru mass-media easti distorsionată. Tru idyiulu kiro, pţănili boţ jurnalistiţi ţi suntu critiţi cu putearea politică agiumsiră ţinta a născăntoru campanii di discreditare, nkisiti ică di actori politiţ, ică di instituţii di presă cu ună lungă istorie di călcari ali etica profesională.
Ma multu, jurnaliştilli armân ţinti a fuvirserloru, nica şi cu moartea. Tru 2022, instanţili pronunţară dauă condamnări penale contra a născăntoru persoane cari feaţiră infracţiuni ţi mutrea siguranţa-a jurnaliştilor. Ună ditu aesti condamnări, cari nu easti difinitivă, mutrea băgarea tu practico a planlui ti vătămarea a unlui jurnalistu – cundille Liana Ganea.
Dimecu, scoati tu videală şi corespondenta Radio România la Paris, uidisitu cu raportulu adratu di Reporteri fără Sinuri, condiţiile di exercitare a zănatillei di jurnalistu suntu greali tu şapte ditu dzaţi văsilii a lumillei. Cama di 50% ditu populaţia mondială băneadză tru văsilii iu catandisea easti multu defavorabilă şi ma puţăn di 1% s’hărseaşti di privilegiul a unei alithea libirtati a presăllei. Anlu tricut, 55 di jurnalişti fură vătămaţ şi tru kirolu ili di itia că lucra pi aestă zănati, iara alţă şapti di la ahurhita aluştui an. Tru aestă oară, cama di 500 di jurnalişti suntu ncllişi ică suntu ţănuţ tră delicti di presă. Propaganda, politică, manipulărli economiti, conţănuturli false genearate di mintimineaţa artificială aduc dizinformare, cari easti părăstisită tru raportu ca hiinda fuvirsearea ma mari contra a libirtatillei tru presă tru lumi.
Autoru: Bogdan Matei
Armânipsearea: Taşcu Lala
