Reacții la moartea a Văsiloañillei
Hlambura britanică fu dipusă tru bernă la Pălatea Buckingham tru oara anda vini hăbarea lae ti moartea a Văsiloañillei Elisabeta a II-a, aţea cari va sarmână un simbol tră lumea tută.
Corina Cristea, 09.09.2022, 13:29
Hăbarea ti moartea a Văsiloañillei Elisabeta a II-a, pi ilikia di 96 di añi și dupu 70 di añi di dumnille, anvirină tut mapamondulu. Bitisita a unăllei eră- aşi easti zuyrăpsită treaţirea la Aţelu di Analtu a nai ma longeviv monarh ali Marii Britanii. Elisabeth agiumsi văsiloane tru 1952, la 25 di añi, dupu moartea a afendă-sui, Văsillelu George al VI-lea. Premier ali Mari Britanie era tru aţelu kiro Winston Churchill, iara Uniunea Sovietică nica era cumăndusită di Iosif Stalin. Pi hiotea a dumniillei a llei – ună di nai ma lundză ditu istoria ali Europă — văsiloañea s’andămusi cu 13 ditu aţelli 14 di prezidenţă americani cari era contemporañi cu năsa şi fu martoră la evenimente cari marcară istoria a văsiliillei a llei şi a lumillei, di la aselenizare şi bitisita a Polimlui Araţi, la atacurli teroriste di la 11 di yismăciuni şi ieşearea ali Mari Britanie ditu UE. “Văsiloñea Elisabeta a II-a fu ună piştireauă pi cari Marea Britanie modernă fu anălţată. Văsilia a noastră cunuscu dizvoltari şi bubukisi sumu dumnillea a llei” – declară năulu premier britanic, Liz Truss, băgată pi ipotisi di fosta suverană cu maş cu ndauă dzăli ma ninti.
Șefañi di statu și di guvernu și personalităț ditu lumea tută s’feaţiră pişmani ti moartea a Văsiloañillei și yilipsiră personalitatea aliştei. Secretarlu general al ONU, Antonio Guterres, spusi că Văsiloanea fu multu tiñisită ti nămuzea, demnitatea şi cilăstăsearea ţi li spusi tru lumi. Reacţii viniră şi ditu Statele Unite, nai ma aprukeatlu partener ali Mari Britanii, di iu Casa Albă dimăndă că iniñile şi minduerli s’ndreaptă cătă familia văsilikească şi populu britanic. Tutunăoară, prezidentulu a Consiliului European, Charles Michel, angrăpsi “minduerli a noastri suntu deadunu cu fumeallea văsilikească britanică şi cu aţelli cari suntu di jeali ti kirearea a llei”. România easti deadunu cu populu britanic şi Fumeallea Văsilikească britanică tru diplândzearea a moartillei Majestatillei a Llei Văsiloñea Elisabeta a II-a, dimăndară și autoritățile di București. Tru mesajlu a lui di puryuriseari, prezidentulu Klaus Iohannis spusi că dumnillea a Văsiloañillei Elisabeta a II-a easti un simbol di mari simasie a loialitatillei şi a angajamentului andicra di serviţiul public. Iara biroulu di presă a Custodilui Cărunăllei ali Românie dimăndară că Majestatea a Llei, Margareta, şi Alteţa a Llei Regală Prinţipili Consort, deadunu cu tută fumeallea văsilikească, nviţară cu mari dureare hăbarea lae că dusi la Aţelu di Analtu Majestatea a Llei Văsiloanea Elisabeta a II-a.
Ligătura speţială anamisa di văsilleadzlli ali Românie și aţelli ali Mari Britanii ahurhi aoa şi aproapea un secol, maia a văsiloañillei Maria a Româniillei hiinda văsiloañea Victoria ali Marii Britanii. Văsiloanea Elisabeta a II-a ali Marii Britanii eara cusurină di gradul al treilea cu fostul suveran ali Românie, Mihai I. Tru idyiulu kiro, văsillelu Mihai ali României și prințul consort Philip, atelu cari fu bana tută ningă Văsiloañea Elisabeta kiro di 74 di ani, era cusuriñi și era amintaţ tru idyea dzuuă. Hillilu aţelu marli ali Văsiloane, atelu cari agiumsi tora automat văsillelu Charles al III-lea, spusi multă vreari şi miraki ti Transilvania nica di la prota a lui vizită tru România, ţi u feaţi tru 1998. Di atumţea, daima vini tru România, iu ari anvărliga di 10 nicukirati, nai ma cunuscută hiiinda aţea di Viscri, hoara transilvăneană agiumtă cu anami tru tută Europa di itia a luştui. Zona amintă multu di multu tru comate di turismu, maxus după alăncearea, tru 2011, a documentarlui Wild Carpathia, tru cari, tru atelu kiro prințul clirunomu, easti un veritabil ambasador ali Românie.
Autoru: Corina Cristea
Armânipsearea: Taşcu Lala
