Programlu „Rabla local”
Nilli di oamiñi sngrăpsiră tru cadrul Programlu mutrinda casarea aftukinatloru veclli - Rabla Local, cari ahurhi tru România.
Mihai Pelin, 01.08.2023, 13:50
Tru România, luni, ahurhiră ngrăpserli tru programlu Rabla local, pritu cari nicukirlli a aftukinatloru ma veclli pot tra ş-caseadză autoturismul. Aestu ahuhrhi cu stângul, tră itia că, tru protili minute di la lansare, aplicaţia ali Administraţie Fondului tră Mediu s-ambudyiusi. Problemele fură ama remediate, iara ministrul a mediului, Mircea Fechet, spuni că suntu localităţ cari ş-bitisiră bugetlu ahărdzitu tu aestă noimă, tru prota dzuuă hiinda emise pisti 12 di ñilli di vouchere.
Tru program s-nreghistrară 500 di primării, iara bugetlu ahărdzitu easti di 240 di miliuñi di lei (cca. 48 di milioane euro). Tră cathi aftukinată veaclle, cu norma di poluare Euro 3 ică inferioară, adusă la casari, româñilli va s’llia 3.000 di lei (cca. 600 euro), fără borgea tra s’ancupără ună aftukinată nauă la alăxeari. Ditu aestă sumă, 2.400 di lei yinu di la ministerlu a Mediului și 600 di lei di la primărie. Prota jgllioată easti thimilliusearea a unui cont pe site-ul Administraţiei Fondului tră Mediu, www.afm.ro, şi maş după verificarea a condiţiilor di eligibilitate va s’da acceptul tră casare. Anamisa di nai importante condiţii s’arădăpsescu vicllimea di nai ma pţănu 15 di añi ali aftukinată, domiciliul tru localitatea di iu s’caftă păradzlli şi s’aibă păltiti taxili şi impozitili locale.
Tutunăoară, easti multu important ca nicukirlu auto s’verifică desi unitatea administrativ-teritorială – comună, căsăbă, municipiu ică sector – easti ngrăpsitu tru aestu program.
Autoritățli spunu că finanţarea da izini ti casarea a 100.000 di autovehicule veclli şi poluante. Persoanili aprukeati tru Programlu Rabla Local nu pot s’ufilisească păradzlli ţi lă si deadiră tra s’ancupăra ună aftukinată la mâna a daua cu norma di poluare Euro 5 ică inferioară. Oamiñilli pot si s’ngrăpsească tru program până la 31 di agustu ică până la epuizarea a bugetului ahărdzitu. Cama deapoa, administraţia va s’pitreacă lista cu aţelli ngrăpsiţ la primării, cari va u ducă niti procedura la nivel local.
Asociația Europeană a Producătorilor di spuni că, tu bitisita a anlui 2021, România avea unu di nai ma veclli parcuri auto ditu Europa, cu ună ilikie medie di 15,1 ani, hiinda năstricută maş di Cehia (15,6 ani), Estonia (16,8 ani) și Grecia (17 ani). La alantu capu eara Luxemburg (7,6 ani), Danemarca (8,5 ani) si Austria (8,7 ani).
Uidisitu cu Direcția Ghenerală Permise di Conducere și Anmatriculări (DGPCI), la bitisita a anlui ţi tricu, tru România era nmatriculate pisti 7,8 milioane di autoturime, aproapea un cirecu (2,4 miliuñî) cu pisti 20 di ani, iara 2,38 milioane cu ună vicllimi anamisa di 16 și 20 di ani. Ditu totalu a autoturismelor di pi călliurli ali Românie, maş 1,5 milioane işiră pi porțăli a favriţlor tru 10 lli añî ditu soni. Românii preferă maxus aftukinatli diesel (pisti 50%), iara nai ma ancuparate modeli suntu Volkswagen și Dacia, fabricată la uzina di la Mioveni ţi nicukiru suntu francezii di la Renault. Lipseaşti s’aduţemu aminti că, tu bitisita a anlui 2022 avea si pisti 24 di ñilli di aftukinati cu motorizări complet electriţi, aproapea diplo andicra di anlu di ma ninti.
Autoru: Mihai Pelin
Armânipsearea: Taşcu Lala
