Programlu “Casa veardi fotovoltaiţi”

Instalatorlli a sistemelor di panouri fotovoltaiţi pot si sngrăpsească, ditu 2 di maiu, tru programlu finanţat di Administraţia a Fondului tră Mediu.

Tașcu Lala, 02.05.2023, 15:19

Ahurheaşti etapa 2023 a programlui Casa veardi fotovoltaiţi. Ma ghini spusu, ditu 2 mai, tru program pot si s’ngrăpsească firmili şi instalatorllii cari monteadză ahtări sisteme alternative di energie veardi. Cama deapoa, va s’ahurhească procedurli tră persoanele fiziţi ică juridiţi cari vor să s’hărsească di aţelli 20 ñilli di lei di la Stat tră instalarea di panouri fotovoltaiţi. Ministrul a Mediului, Tánczos Barna, estimeadză că fondurli ţi fură ahărdziti pănă tora putea s’hibă dublate, catandisi tru cari aproapea 150.000 di nicukirati va s’aibă panouri fotovoltaiţi până la inşita-a anlui. Aesta, cara va s’hibă duri numirlu di instalatori cari si s’ngrăpsească tru program.

Tánczos Barna: “S’ngrăpsescu firmili cari instaleadză panourile fotovoltaiţi. Tru prinţipiu, pi 15 di mai dişcllidemu sesiunea ti dipuneari a căftărloru di finanţare tră prima euroregiune. Ampărţămu aprukearea a căftărloru di finanţare pi perioadi ahoryea, andicra di euroregiuni, tră să scadă presia pi sistemlu informatic şi, ma s’amintămu şi acordul a Comisiei Europene, deadunu cu dl. Boloş (n.red. ministrul Investițiilor și Proiectelor Europene), putem nica s’dublăm, anlu aestu, bugetlu ahărdzitu ti aestu program şi s’agiundzemu la 150.000 di sisteme instalate tru 2023.“

Tră s’poată si s’ngrăpsească, aţelli cari vor s’amintă finanţare tru aestă nauă etapă a programlui Casa veardi fotovoltaiţi lipseaşti s’aibă dovada căţe casa easti intabulată, că nu au borgi la bugetele locale şi di Stat, ama și – ca ună năutate – că adresa ditu cartea di identitate easti idyea cu aţea a loclui iu s’adară instalarea. Tră rezervarea subvenţiillei di la Stat, anlu aestu aţelli ţi voru aestu lucru va s’ngrăpsească singuri (nu pritu intermediul a firmilor instalatoare) tru aplicaţia informatică ali Administraţie Fondului tră Mediu.

Prin instalarea sistemelor di panouri fotovoltaiţi tră produţirea di energie electrică, elli va s’poată s’anvălească necesarlu di consum, ama şi s’da surpluslu tru reţeaua naţională. Beneficiarllii au ună finanţare di până la 90% ditu valoarea totală a hărgiloru eligibile, tru limita sumăllei di 20.000 lei, tră instalarea di sisteme di panouri fotovoltaiţi cu ună puteari di minimum 3 kWh. Bugetlu total ahărdzitu easti di 2 miliardi di lei, păradz ţi suntu ananghi tră 100.000 di beneficiari.

Că ufilisescu agiutorlu a Statului ică apufusescu ta s’instaleadză integral ditu buget propriu sisteme alternative di energie veardi, româñilli suntu tut ma sinfirisiţ s’hibă indipendință energetic. Maxus după creaștirea a păhadzloru la curent electric și gaze naturale, căftarea di panouri solare lo silă.

Armânipsearea: Taşcu Lala