Prioritățli a sesiunillei parlamentară
Nomurli ali Justiţie şi Nomurli ali Educaţie suntu obiectivili prinţipali a nauăllei sesiuni parlamentară ahurhită București.
Daniela Budu, 01.09.2022, 13:02
Senatlu și Camera a Deputațlor di București ahurhiră, gioi, ună nauă sesiune parlamentară, a doua di estanu. Pacheta a Nomurloru ali educaţie, ama şi alăxearea a Nomulroru ali justiţie, a Codlui penal şi a Codlui di proţedură penală suntu prioritare tră parlamentarlli ditu coaliţia la guvernare PNL-PSD-UDMR.
Pacheta a Nomurlori ali justiţie, cari ancurpilleadză proiectili mutrinda statutlu a giudicătorilor şi procurorilor, organizarea judiciară şi Consiliul Superior ali Magistraturăi, fu aprobat tora ma ninti di Executiv şi faţi parti ditu un bairu di alăxeri asumate dituintea a partenerlor europeni, cu scupolu tra s’ modirnizeadză tutu sistemlu judiciar. Neise, alăxearea a nomurloru ali justiție easti scupolu asumat di România, emu pritu Planlu Național di Redresare și Reziliență, emu pritu Mecanismul di Cooperare şi Verificari, di cari ţăni adirarea la Spațiul di libiră urdituari Schengen.
Tu ţi mutreaşti năili Nomuri ali educație, aestea fură băgati tru dibateri publică şi suntu sertu cutugursiti di societatea ţivilă, di lidirllii a prinţipalelor universităț nica şi di alepţălli locali. Proiectili pruvedu alăxeri cabaia mări tră elevi, inclusiv ligate di evaluare şi admiterea la liceu şi facultate. Ună altă prioritate a nauăllei sesiuni easti adoptarea a pachetăllei cu nomurli a securitatillei. Tutunăoară, va s’hibă zburăti tru naua sesiune parlamentară şi meatrili cari va s’hibă aprobate tru Guvern pritu ordonanţă di urgenţă mutrinda compensarea a păhălui la energie.
S’prefigureadză ma multi proiecte pi teme suţiali. Tru aestu context, UDMR pripusi un proiectu mutrinda darea a unlui agiutor di stat tră ţelli cari s’ngăldzăscu cu leamni. Tu arada a lui, PSD pripusi majorarea a pensillei minimă, a valorillei punctului di pensie şi a tiñiilleai di cafi mesu minimă pi economie la 3.000 di lei.
Ditu opoziţie, USR feaţi timbihi ti asupra activitatea a ministrului energiei, Virgil Popescu, şi dimăndă ună moţiune simplă la adresa aluştui. Aduţemu aminti că tru sesiunea di ma ninti, la Camera a Diputațlor eara dipusi ţinţi moțiuni simple ali opoziție la adresa a născăntoru miniștri a guvernului cumăndusitu di liberalu Nicolae Ciucă. Tuti fură dati năpoi pritu votlu a majoritatillei.
Sesiunea parlamentară anterioară adusi adoptarea a nomlui pritu cari s’da izini ti exploatarea a gazilor ditu Amarea Lae. Nomlu offshore”, inițiatu di lidirlli a coalițiillei di guvernare, tricu iruşi di dauli camere a Parlamentului, iara exploatarea a gazelor ditu perimetrul Neptun Diep ditu Amarea Lae va s’asiguripsească indipendința energetică ali Românie, tru contextul a conflictului ditu Ucraina. Uidisitu cu nomlu, România ari întânitate la ancupărarea a gazlui extraptu ditu aestu perimetru, iarq surpluslu va s’hibă exportat.
Unu altu nomu, cabaia zbuătu la Parlament și aprobatu după multi dibaturi, fu atelu pritu cari s’ disființeadză secția tră investigarea a infracțiunilor ditu justiție. Avu și ună premieră: Parlamentul României și aţelu ali Republicii Moldova viţină avură ună andamasi comună Chișinău tră s’dimăndă un mesaj comun ti andruparea ali Republicii Moldova tru proţeslu di adirare la Uniunea Europeană.
Autoru: Daniela Budu
Armânipsearea: Taşcu Lala
