Prinţul Charles yini diznău tru România
Clirunomlu a Cărunăllei Marii Britanii, Prinţul Charles, easti vinitu tru ună nauă vizită tru România, după ună dănăseari di itia a añilor di pandemie.
Daniela Budu, 26.05.2022, 21:48
Aflat tru ună nauă vizită tru România, Prinţul Charles di Wales s-andămusi, ñiercuri, Bucureşti, cu prezidintul Klaus Iohannis, cu premierul Nicolae Ciucă şi Custodile a Cărunăllei Române, Margareta. Muabeţli fură ţănuti pi criza a arifugaţloru ucraineni şi pi agiutorul dat di România a văsiliillei viţini tru contextul ali invazie arusă. Uidisitu cu Administraţia Prezidinţială, şeflu a statlui lu informă pi Prinţul di Wales ti hub-ul umanitar di Suceava şi simfunizarea a gaereţloru di agiutoru ditu partea a ma multor state tru hăirea ali Ucraină. Klaus Iohannis şi clirunomlu a Cărunăllei Britanică zbură ti relaţiile bilatearale şi Parteneriatlu strategic româno-britanic, ti cearei di limitare a efectilor alăxerloru climatiţi şi tră conservarea biodiversitatillei, ama şi ti oportunitatea dizvoltarillei a născăntoru proiecte educaţionale mutrinda alăxerli climatiţi. Klaus Iohannis sumlinie angajamentul a Bucureștiului tra s’bagă tru practico obiectivele europene tru planu di alăxeri climatiţi.
Tru cadrul ali andamasi cu şeful a Guvernului, Prinţul Charles fu sinfirisitu di politiţli a Româniillei tru domeniul a energiillei veardi şi regenerabile. Nicolae Ciucă şi spusi dişcllidiareaa ti andruparea a investiţiilor tru energia veardi, nai cama multu aţea eoliană offshore tru cari companiile britaniţi suntu aştiptate s’inveastiască tru perioada yinitoari. Prinţul Charles avu muabeti cu premierlu și ti polimlu ditu Ucraina. Uidisitu cu un comunicat a Executivlui, prinţipalele mindueri şi cilăstăseri a Alteţăllei a Lui Regale mutriră fuvirsearea a securitatillei alimentari a lumillei, la cari s’agiumsi di itia a ambudyiusearillei porturli Odisa şi Nikolaev di către askerili ruse. Iara Nicolae Ciucă părăstisi gaereţli a Româniillei di andrupari a Ucrainăllei: aprukearea şi apănghisearea a arifugaţloru, andruparea a cetăţenilor ucraineni strămutaţ internu şi a atiloru cari ş-u-apără văsilia, cum și andruparea a exporturlor ucrainene di yiptu. Tutunăoară, şeflu a Guvernului di Bucureşti părăstisi perspectivili şi fuvirserli genearate tru regiunea ali Amarea Lae, tru contextul a polimlui di la sinuru.
Diadunu cu Margareta, Custodile a Cărunăllei Române, Prinţul Charles vizită ţentrul tră arifugaţ ucraineni organizat la București, iu avu muabeti cu arifugaţ şi cu voluntari cari lli-agiută. Centrul nregistrează cathi dzuuă cama di ună ñille di vizitatori ucraineni, cari s’ducu aclo ti aprovizionari cu produsi di maximă ananghi: alimenti, produse di igienă, strañe şi ancălţăminte, ama şi tră hăirlătica cu servitii sociale şi consiliere pi perioada şidiarillei tru România.
S’aşteaptă ca Prinţul Charles să-şi treacă dzălili a vizităllei a lui private tru horli ditu Transilvania, iu ari ndauă nicukirati. Aestu agiumsi tră prota oară tru România tru 1998 şi, di atumţea, vizită văsilia aproapea cathi an. Tru aestă perioadă, andrupă fundaţii şi programe cari anveaţă masturlli, aveaglle patrimoniul cultural ică biodiversitatea ali Transilvanie, iara pritu Fundaţia Prinţul di Wales România, Alteţa Sa Regală dizvoltă programe di andrupari a Niţloru fermieri şi un program speţial tru agiutorlu a militarilor români pliguiţ tru Afganistan şi Irak.
Autoru: Daniela Budu
Armânipsearea: Taşcu Lala
