Priimnari cătă cabana Mălăieşti

Adză vă pripunemu ună priimnari tru ună zonă montană, accesibilă tru tutu kirolu a anlui. Vă călisimu pi călliuri di munti tru inima-a munţălor Bucegi, cătră cabana Mălăieşti, ti easti la altitudituea di 1720 di meatri

Ana-Maria Cononovici, 28.10.2021, 13:18

Adză vă pripunemu ună priimnari tru ună zonă montană, accesibilă tru tutu kirolu a anlui. Vă călisimu pi călliuri di munti tru inima-a munţălor Bucegi, cătră cabana Mălăieşti, ti easti la altitudituea di 1720 di meatri, tru Valea Mălăieşti, ună vali muşeată, ţi ari mardzina pirguri montani. Intrarea tru zonă poati să s’facă pi lenu turlii di trasee, nkisinda ditu localităţli Bran, Râşnov, Buşteni ică Predeal, anvălinda ună diferenţă di nivel di ună ñille di meatri ş’cama. Agiundzemu aşi tru ună zonă multu pitorească, iu aprovizionarea s’faţi cu elicopterlu ică cu yumarlli şi cu callii pi cari puteţ să’lli videţ anda pascu liberi anvărliga di cabană. Anaparti di vimtu kiskinu, puteţ s’beţ apă di la izvurlu ţi easti dinintea a cabanăllei, ma puţănu meslu agustu cându di arada seacă.

Dan Constantin Ozunu, di la ună agenţie di turismu ţi ndreadzi excursii montani nă spusi cama pi largu: “Traseulu ţi vă’lu pripunemu cătă cabana Mălăieşti easti unu ditu nai ma muşeati trasee şi nai cama veclli trasee ditu munţăllii Bucegi. Cabana Mălăieşti easti una ditu nai ma izolati cabani, acceslu la cabană poate să s’facă maş pri padi, nu ari alti modalităţ ta s’agiundză la ea. Easti ună cabană tru mesea-a fisillei, anamisa di munţă, multu aproapea di kipita Omu şi easti ună ditu nai ma pitoreşti cabani ţi li videmu tru România. Condiţiili di cazari suntu bunebuni tră ună cabană, ari căldură, sală di measi şi restaurantu, iu nă adunăm şi di arada cântăm la chitară până amănatu tru noapti, energie electrică pritu genearator, până la ună tadi oară şi suntu ma multi călliuri di acces, tră s’agiundzemu la aestă cabană. Una ditu călliurli di acces easti pi traseulu Tache Ionescu, altă cali easti di cătă Râşnov. Hiindand adrată anamisa di Râşnov şi Sinaia, Buşteni, acceslu poati să s’facă pritu ma multi călliuri. Cabanierul easti soţu cu fisea. Ningă cabana Mălăieşti ari şi un centru salvamont, aşi că himu tru sigurlăki aclo. “

Uaş ndnă cabană la cari puteţ s’vă dănăsiţ şi tră ndauă nopţă, cu rezervari di ma ninti, ama iu puteţ s’dănăsiţ şi maşi ndauă săhăţ, ninti ta s’nkisiţ diznău pi călliuri di munte. Dan Constantin Ozunu, cama minuţişu: “Traseulu poati s’hibă adratu pi ma multi călliuri, aşi că si s’facă un circuit, nkisinda di Râşnov, s’dzăţemu, agiundzemu tru 4-5 săhăţ până la cabana Mălăieşti, a deapoa după ţi nă ngăldzămu, mcămu unu ciurbă ică bem ună ceai, putem s’nkisimu cătă cabana Gura Diham, a cama deapoa icătă Buşteni. Traseul easti practicabilu inclusiv iarna, noi, oamiñilli di munti spunemu că nu ari kiro slabu, ari maş echipamentu niuidisitu şi tru aestă noimă easti ananghi di bocanci “di trei sezoani”, dimi s’aibă ună talpă pi cari s’nu arkişurămu, s’hibă pisti gleznă, ta s’ţănă glezna s’nu nă accidentăm şi s’hibă impermeabili. Dealihea şi ună pelerină di ploaie easti urminia faptă s’hibă tru rucsac, ună bluză di turlia polară şi pantaloni impermeabili.”

Zona easti ti anami şi tră atelli ţi au mirakea ti alpinismu, di aoa nkisinda trasee di escaladă, cu lenu turlii di gradi di dificultati.

Autoru: Ana- Maria Cononovici

Armânipsearea: Taşcu Lala