Premierlu Rep. Moldova la București
Responsabilii politici ditu România şi Republica Moldova viţină spunu că relaţiile bilatearale suntu execelente.
Tașcu Lala, 03.03.2023, 11:25
Premierul român, Nicolae Ciucă, ălli, taxi, ñiercuri, București, a omologului a lui ditu Republica Moldova viţină (ex-sovietică, majoritar românofonă), pro-occidentalul Dorin Recean, agiutorlu a Bucureștiului tră realizarea reformelor, anvărtuşearea economiei, a rezilienţei şi securitatillei statului, cum şi tră continuarea imnaticlui european. Ciucă salute aţea ţi număsi nivelu excelentu a relaţiilor bilatearale și dinamica remarcabilă a dialogului anamisa di București și Chișinău. Uidisitu cu premierlu, România ş-anvărtuşi statutlu di prim partener comercial al Republicii Moldova. Comerţul bilatearal, adusi aminti, năsu, criscu cu 1,2 miliarde di dolari tru 2022, neise, s-agiumsi la aproapea 3,6 miliarde. Tu văvaia a polimlu fuvirosu nkisitu di Rusia contra ali Ucraina, spusi permierul român, asistăm la tutu ma multe cil4stăseri ti aspărdzearea ali Ripublica Moldova, di creare artificială di mintireaşi, di pirmituseri ostile adrati pi propagarea di hăbări arădociki. “Lu asiguripsimu omologlu a meu tu ligătură cu ndrupămintulu ti niminari ali Românie tră tiñîsearea a suvearanitatillei şi integritatillei teritoriali ali Ripublica Moldova tru sinurli a llei pricunuscuti la nivel internaţional” — nica spusi premierlu Ciucă.
Autorităţli di Bucureşti va s’ndrupască fără rezerve conduţirea di la Chişinău tră s’agiungă pi obiectivlu di integrare a Republicăllei Moldova tru Uniunea Europeană — ălli dimăndă a premierlui Recean şi prezidentulu Klaus Iohannis. Oficialu di Chişinău avu ună andamasi şi cu prezidentulu a Camerăllei a Deputaţlor di Bucureşti, Marcel Ciolacu, cari lu asiguripsi ti agiutorlu ali Românie tră ună parti ditu consumlu di gaze a cetăţenilor ripublicăllei a llei, pritu intermediul a contractului di importu convenit cu Azerbaijan. Şi Custodele Coroanăllei, Principesa Margareta, lu aştiptă Bucureşti pi prim-ministrul a statlui viţinu şi adusi aminti diznău ti agiutorlu di cari s’hărseaşti Ripublica Moldova ditu partea Fumeallillei Văsilikească ali Românie.
Dorin Recean feaţi tru România prota a lui vizită tru xeani după ţi u aleptu tu ipotisea di premier, la giumitatea a meslui ţi tricu. “București va s’negu tru prima vizită. Lipseaşti s’nkisimu mecanismili di lucru aoa tru Ripublica Moldova, și ună ş-ună deapoa va negu București. (…) Himu privilegiaț, avem aestă relație bună cu România, cari nă agiyută cabaia multu ti năstriţearea a crizăllei energhetiţi tu imnaticlu a nostru european. Fu avocatlu a nostru tru instituțiile europene, aţea turlie tra s’putemu s-niintămu tru imnaticlu european” – spusi premierliu Recean. Tru programul guvenamental prezentat ninti di votul di băgari pi ipotisi ditu Parlament, s’cundillea, neise, că ună atenţie maxus va s-da ti ligăturli cu România, cari va s’hibă “strateghiţi” şi “privilegiate”.
Autoru: Roxana Vasile
Armânipsearea: Taşcu Lala
