Perspectivili a parteneriatlui strategic România – SUA
Ankisitu cu furñia a vizităllei ţi u feaţi Bucureşti prezidentulu Bill Clinton, Parteneriatlu strategic anamisa di România şi SUA umplu unu cirecu di etă.
Ştefan Stoica, 12.07.2022, 18:52
România nu ari un soţu ma bun andicra di Statele Unite, dimăndă secretarlu di stat american, Antony Blinken, cu ucazea că s-umplură 25 di ani di la lansarea a Parteneriatlui Strategic anamisa di Washington şi Bucureşti.
“Anvărtuşimu ligăturli tru dumenea ali apărari, ali energhie şi a cooperarillei economiţi. Ambărţitămu un angajamentu tra s’pindzemu fuvirsearea ali Rusie tru reghiune”, cundilleadză Blinken tru mesajlu a lui.
Optu foşti ambasadori a Statilor Unite tru România spusiră tru arada a loru, tru ună carti comună pitricută cu aestă itie, că Parteneriatlu strategic anamisa di ateali dauă văsilii agiumsi s’hibă ună di tu nai cama buni investiţii americane tru Europa. Parteneriatul – sumliniadză diplomaţlli — agiutară la construirea a unei Românii vărtoasi şi tru prucukie, cari easti adză unu di aţelli ma aprukeată şi ma axi aliatu a Statelor Unite tru Europa Centrală şi di Est. Tru opinia lor, includirea a Româniillei tru programul Visa Waiver, cari poati s’lă da izini a cetăţenilor români s’călătorească tru SUA fără vize, poati s’hibă un amplificator vărtosu tră tuti dimensiunile a parteneriatlui.
Tră prezidentulu Klaus Iohannis, Parteneriatlu Strategic cu SUA avu un rol diterminantu tră alăxearea democratică a văsiliillei şi dusi la tindearea a cooperarillei bilaterale şi tru plan internaţional, la anvărtuşearea a ligăturăllei transatlantiţi şi la anvărtuşearea a ligăturilor anamisa di aţeali dauă populi.
La un cirecu di secol di la lansari, România şi SUA suntu angajate tră tindearea şi ahăndusearea a tutulor dimensiunilor Parteneriatului Strategic, di la cooperarea bilaterală excelentă tru domeniul a securitatillei şi apărarillei, până la atea tru domeniile economic, a securitatillei energheetiţi, educaţie, cercetari şi relaţiilor interumane, dimăndă, tru un comunicat, Administraţia prezidinţială.
Uidisitu cu aesta, vătuşamea a Parteneriatlui Strategic cu Statele Unite ali Americă fu dimonstrată tu kirolu ditu soni pritu hăbarea faptă di prezidentulu Joe Biden mutrinda suplimentarea prezenţăllei trupelor americane tru România.
Polimlu nkisitu di Rusia contra ali Ucraină şi consecinţele a lui uruti pi livelu global şi tru sectoari cleaie nă faţi s’cilăstăsimu diadunu, ma adunaţ stogu ca vărnăoară, tra s’aflămu cearei, tru plan bilateral ică euroatlantic, ta s’anvărtuşeadză şi s’veaglle valorile, securitatea şi rezilienţa societăţilor noastre, cundilleadză şeful a statului român.
Dizvoltaria Parteneriatului Strategic cu Statele Unite ale Americii pe tuti dimensiunile a llei di cooperari agiumsi ună prioritate a Românillei, diclară şi prim-ministrul Nicolae Ciucă.
Cooperarea streasă şi substanţială tru domeniul a securitatillei şi ali apărari s-anvărtuşe permanentu şi easti ună componentă vitală a Parteneriatului Strategic anamisa di România şi SUA, iar relevanţa a llei fu scoasă tu vidială nica ma multu tu hăvaia a invaziillei paranou, niprovocate şi nintimilleati ali Rusiei tru Ucraina, cundilleeadză, tru mesajlu a llei, ministerlu di Externe di Bucureşti.
Autoru: Stefan Stoica
Armânipsearia: Taşcu Lala
