Mindueri ti turismul ditu 2024
Tu Românie, tu 2024, criscu numirlu di apartamenti loati cu niki tu reghimu hotelieru. Alinarâ ș-pâhadzlli la hoteluri.
Tașcu Lala, 28.04.2024, 14:34
Patronatili ditu industria hotelierâ româneascâ s-așteaptâ estanu la un volumu a activitatillei nai pțânu idyea cu ațea di anu, ama ș-la pâhadz niheamâ ma mări, di ispetea a criștearillei a taxilor ş-a pâhălui a materiiloru primi ş-a forţâllei di lucru.
Turismul di business easti luyursitu s-creascâ tu câsâbadz tu catastisea gheopoliticâ ş-electoralâ di estanu, iara opţiunili ti destinaţiili di vacanţâ armân influenţati di chiro, di imaghinea ditu mass-media ş-di puterea di ancumpârari, luyurseaști prezidenta a Federaţillei ali Industrie Hotelierâ, Simona Constantinescu. Ea feați tâmbihi ti criștearea multu mari a numirlui di apartamenti loati cu niki tu reghim hotelier pritu platformili online.
Tu Românie, oferta reprezintâ unâ ponderi mari ditu numirlu acutotalui a locurlor di cazari, ama ş-tu unâ dumeni ți nu easti duri reglementatâ, dzâți Simona Constantinescu:
“Ari zoni cata cumu easti mardzinea di Amarea Lai ică Bucureştiul, iu, tu niscânti perioadi, agiundzi la 50% ditu cazări. Ti paradigmâ Braşovlu i Bucureştiul au niscânti ori livelu maximu. Bucureşti ari vârâ 4.600 di listări tu sistemu apartamentu loatu cu niki. Anda mutrimu la câti suntu clasificati la Ministerlu a Turismului, bâgămu oarâ că niți 10% nu sunt clasificati. Unâ câsuri easti că s-fați unâ astrițeari ți nu easti isa. Hotelurli, ditu pâradzlli loaț di la clientu, lipseaști s-pâlteascâ vârâ 30% taxi, s-toarnâ TVA, taxi pi tiñia di cathi mesu i city taxâ, salvamontu, taxâ di parcari, turlii-turlii di taxi, iara ahtări lucri nu s-facu la apartamenti, nu s-toarnâ tu isnafi.”
Uidisit cu spusa a INS, tu meslu șcurtu, oaspițlli viniț tu structurli di aprucheari turisticâ cu funcţiuni di cazari, emu ș-la apartamenti ș-udadz loaț cu niki furâ, acutotalui, 847 di ñilli di oamiñi, pi crișteari cu 4,2% andicra di idyiul chiro ditu 2023. Ditu aestu numiru, tu meslu șcurtu, vinita a turișțâloru româñi tu structurli di aprucheari turisticâ cu funcţiuni di cazari furâ 84,4%, iara ațeali a turişțâloru xeñi 15,6%.
Vinita a oaspițloru xeñi tu Românie, ânreghistraț la punctili di sinuru, furâ cama di 917 ñilli di oamiñi, pi crișteari cu 7,5% andicra di meslu șcurtu a anlui ți tricu. Di arada, tu meslu șcurtu, oaspițlli româñi șidzurâ 1,9 dzâli, iara xeñilli 2,2 dzâli.
Tora, româñilli s-andregu ti minivacanța di șasi dzâli ditu ahurhita a meslui mai, cându va s-hibâ ș-Paștili Ortodoxu (5 di maiu). Atumțea dzăț di ñilli di turişțâ suntu aştiptaţ mardzina di Amarea Lai, iara hotelierilli andreapsirâ programi ş-pacheti aleapti. Dzăț di hoteluri, vili ică apartamenti tu reghimu hotelieru ditu tuti staţiuñli ți suntu mardzina di Amarea Lai au oferti multu-mshati. Uidisitu cu aghențiili di turismu, mirăkilili andicra di añilli ți tricurâ, s-alâxirâ, di la rezervări di dauâ nopţâ la trei i tamamu patru nopțâ di cazari.
Ş-estanu, tu mini-vacanţa di 1 di Mai ş-Paşti, pollu a gimbușillei mardzina di amari va s-facâ Custanța, ama ș-tu staţiunili Mamaia ș-Cotsinești, iara atmosfera va s-hibâ mâyipsitâ pritu conțerti, festivaluri di muzicâ ş-evenimenti gastronomiți/di mâcari.
Autor: Mihai Pelin
Apriduțearea: Aurica Piha
