Pensii ma mări tru România
Di la 1 yinaru, pensiile tru România crescu cu 12,5 procente
Ştefan Stoica, 22.11.2022, 17:08
Fu ună păzărăpseari lungă şi greauă anamisa di partiili a suţatăllei la guvernare tru România pe tema procentului cu cari lipseaşti s’li crească pensiile, dizolvate, practic, tru anlu ditu soni, di ună inflaţie galopantă, cari năstricu 15 procente. PSD, numirlu ună tru coaliţie, vrea ună crişteari diferenţiată, di cari să s’hărsească prota ş-prota persoanele cu pensii ñiţ şi di mesi, majoritare. Di partea a lor, libearalii cundilleară constant tru favoarea a unui proţentu unic, cari s’elimină căbilea ti atacarea ali apofasi di itia a discriminarillei. Neise, PSD, PNL şi UDMR hăbărisiră luni dicseară, că pensiile bazate pe contributivitate va s’crească di la 1 yinaru cu 12,5%. Procentul easti valabil tră tuţ pensionarii, indiferentu di cuantumul a pensillei, ama aţelli cu amintatiţi ñiţ va s’llia, nica şi unu agiutor ditu partea a statului, cari va s’hibă dat anul yinitor, tru dauă tranşe.
Di la 1 yinaru anul yinitor, punctul di pensie va s’hibă di 1.784 lei, pţăn pisti 360 di euro. Di agiutoare suplimentare va s’aibă hăiri oamiñilli tu ilikie cu pensii sumu 3000 di lei, diferenţiat andicra di cuantumul a pensiillei. tutunăoară, persoanele cari au pensii ma ñit di 1.700 di lei va s’llia şi anul yinitoru vouchere speciale di 250 di lei, unăoară la doi meşi, tru tut anlu. Executivul va s’da şi unu agiutoru di 1.400 di lei tră păltearea a facturilor la energie, tră pensionarllii cu ilikia di pisti 60 di ani şi cari au pensii ma niţ di 2.000 di lei. Alocaţiile di stat tră cilimeañi va s’hibă actualizate cu rata inflaţiillei, persoanili cu dizabilităţi va s’llia ună a 13-a indimnizaţie, iar a veteranilor şi veduvili di polimu va lă hibă actualizate indimnizaţiile cu rata ali inflaţie.
“Perioada pi cari u triţemu easti una marcată di multiple crize la nivel mondial şi lipseaşti s’asiguripsimu ună amortizare a efectelor generate di inflaţia criscută. Ti aţea, PNL s-ncuntră susto la niscănti crişteri ma ñiţ di 15% şi amintă tru păzărăpseri crişteri totale cari trecu di 15,8%”, cundille prim ministrul Nicolae Ciucă. Uidisitu cu liderlu social-dimocrat, Marcel Ciolacu, PSD mindui căţe cafi categorie lipseaşti agiutată diferit, iara andruparea di partea a statlui să s’ducă tru proporţie ma mari cătră aţelli cari suntu agudiţ di efectele a crizăllei economiţi. Adză, 91% ditu pensionarllii ditu văsilie au pensii sumu 3.000 di lei şi easti borgea a noastră morală ta s’criştemu amintatiţli a loru cu rata ali inflaţie i, cându va s’avemu căbili, nica ma multu, cundille vicepremierul şi liderul UDMR, Kelemen Hunor.
Ditu opoziţie, prezidentulu USR, Cătălin Drulă, spuni că majorarea cu 12,5% a pensiilor nu aanvăleasti niti barimu di 15%. Di altă parte, stipseasti Drulă, niţi PSD, niţi PNL nu va li elimină pensiili speciale a parlamentarilor, iara di la 1 yinaru s’advgă năi pensii speciale, tră primari. Reforma a pensiilor speţiale, cari nu s’ntimilleadză pe contributivitate şi a curi cuantum easti di ndauă ori mai mari andicra di atelu a pensiilor di arada, easti asumată pritu Programul Naţional di Redresare şi Rezilienţă ama armăni toradioară restantă.
Autoru: Stefan Stoica
Armânipsearea: Taşcu Lala
