Parteneriat strateghicu România – SUA
Un cirecu di seculu di Parteneriatu Strateghicu cu Statili Uniti ali Americă!
Leyla Cheamil, 28.06.2022, 15:36
S-umplură 25 di añi di cându eara băgati thimeallili a unei nauă colaborari româno-americană şi a unlui Parteneriatu Strateghicu, ma ghini spus tru 11 di alunaru 1997, cu furñia a şcurtăllei vizită oficială faptă Bucureşti di prezidentulu american ditu aţelu kiro, Bill Clinton. Parteneriatlu avea tru amprotusa anvărtuşearea a ligăturloru bilaterali, andruparea a proţesului di reformă şi a gaereţloru di integrare euro-atlantică ali Românie, promovarea a rolului a văsiliillei fi sturu di stabilitate şi securitate tru Europa di sud-est. Diplomația di București cundilleadză că, di la oara a lansarillei, Parteneriatlu strategic reprezentă un reper di thimelliu a ligăturlor ditru aţeali dauă state şi, tru idyiulu kiro, ună hălati hăirl4tică di andrupari a gaereţloru interne tru domeniul a reformăllei politiţi, economiţi, militare ică administrative.
14 di añi ma amănatu, tru 13 di yismăciuni, fu adoptată, Washington, Declaraţia Comună mutrinda Parteneriatlu Strategic tră Secolu XXI anamisa di România şi Statele Unite ali Americă. Documentu importantu tră ligătura bilaterală a aţiloru dauă state, aesta confirma buna cooperare la nivelu a Parteneriatului şi apufuseaşti sturlli a ligăturăllei România – SUA: dialog politic, securitate, economie, contacte interumane, ştiinţă şi tehnologie, cercetare, educaţie şi cultură.
Cu furñia a ţiloru 25 di añi di Parteneriat, ambasadorlu român la Washington, Andrei Muraru, fu aştiptat di lidirul di la Casa Albă, Joe Bidin, cari haristusi ali Românie tră agiutorlu pe cari lu-diadi şi lu-da ma largu ali Ucraină di la ahurhita ali invazie ruseşti. Andrei Muraru ălli pitricu aluştui mesajlu a prezidintului Klaus Iohannis şi vrearea tra s’anvărtuşeadză parteneriatlu anamisa di București şi Washington. Tru un mesaj pi Facebook, diadunu cu dauă caduri tru cari easti diadunu cu lidirlu di la Casa Albă, Andrei Muraru angrăpseaşti că România easti nai ma vărtosu aliat a Statilor Unite tru reghiune, ama zona ali Amarea Lae easti, tru aestă oară, nai ma vulnerabil loc ditu tut spaţiul NATO.
“Cara Rusia easti prota fuvirseari iminentă şi directă contra a noastră şi a viţiñiloru a noştri, apandisea nu poati s’hibă că maş ună prezenţă militară americană şi ma vărtoasă tru regiune şi maxus tru Româniaˮ, cundille Andrei Muraru tru postarea a lui.
Di altă parte, tru plan economic, prezidentul Klaus Iohannis salută, dumănică, hăbarea a omologlui a lui american, Joe Biden, mutrinda cooperarea energetică anamisa di România şi Statele Unite, pritu finanţarea di cătră Washington, cu 14 miliuñi di dolari, a unei nauă etapă a programlui di reactoari modulari tru România. “Asiguripsearea a securitatillei energhetiţi easti un scupo comun a parteneriatlui strategic România-Statele Unite” cundille Klaus Iohannis. Tu arada a lui, premierlu Nicolae Ciucă spusi că apofasea a Statilor Unite tra s’finanteadză etapa preliminară a studiilor di inginerie şi proiectare tră dizvoltarea reactoarilor modulari ñiţ ditu România easti componentă di mari simasie a dizvoltarillei pritu programlu nuclear tivilu naţional.
Autoru: Leyla Cheamil
Armânipsearea: Taşcu Lala
