Parlamentul European ndrupaşti Ripublica Moldova

Parlamentul European caftă sahurhească negocierli di aderari cu Ripublica Moldova până la bitisita-a anlui.

Warning: Trying to access array offset on null in /home/web/rri.ro/public/wp-content/themes/rri/template-parts/content.php on line 98
Ştefan Stoica, 20.04.2023, 19:17

Ripublica Moldova băneadză, ndilicati momente di la alăncearea a llei pi harta europeană, tru 1991, şi conflictul armat ditu 1992, dupu cari chiru controlu tru Transnistria, regiune separatistă arusofonă ditu apirită. Cu askirladzlli aruşi arădăpsiţ paranomu aclo, ună economie vulnerabilă şi ună clasă politică ampărţătă anamisa di pro-europeni şi pro-ruşi, Moldova, situată geografic anamisa di România şi Ucraina, easti, tora, prota victimă colatearală a polimlui nkisitu di Rusia.

Republica Moldova armâne expusă dinitea azorillei arusă şi a şantajului energetic, cutulburărlor economice di itia a olimlui ditu Ucraina viţină, catacum şi a cilăstăserloru fapti di Kremlin ta s-lu desstabilizeadză guvernul proeuropean a văsiliillei – spuni Parlamentul European tru ună rezoluţie adoptată ñiercuri. Tru document, legislativlu comunitar salută spiritlu di cumănduseari a prezidentăllei ali Republică Moldova, Maia Sandu, şi a autorităţlor a văsiliillei tru abordarea alustor provocări salami. Rezoluţia spuni că aderarea Republicăllei Moldova poati s-hibăună investiţie strategică tru ună Europă unită şi vărtoasă şi pledeaddză tra s’ahurhească negocierli di aderare cu Chişinăul până tu bitisita a anlui, a aţiloru nauă etape identificate di Comisia Europeană.

Oligarhilli fugari lipseaşti s’hibă extrădaţ tru Moldova, iara Uniunea Europeană lipseaşti s-ndrupască ma largu Republica Moldova tră realizarea independenţăllei energetice, spunu eurodeputaţlli.

Tora ma ninti, prezidenta Maia Sandu lă căftă a compatrioțlor s’iasă, pi 21 di mai, tru Piaţa a Marillei Adunari Naţionali ditu Chişinău, tra să spună andruparea andicra di imnaticlu european pi cari s-angajară autorităţli a ñiclui cratu est-european, cu populaţie majoritar românofonă. Apelu ali Maia Sandu s’faţi tru contextul a cilăstăserloru di destabilizare ali Rusie cari marcară ripublica tru meşlli ditu soni, di la protesti di geadei păltite di andrupătorlli ali Moscova, la tentative ti s’arăstoarnă guvernarea pro-europeană, denunţate di Chişinău.

“Vă căndăsescu s’nă manifestăm, ca populu, apofasea limbidă ta s’hibă parti a fumeallillei europeani, bazată pi tiñie, stabilitate şi colaborari economică…Vă căndăsescu s’lă exighisimu a aţiloru cari nica suntu pi dauă, că apofasili mutrinda yinitorlu ali Ripublica Moldova s’llia tru Ripublica Moldova”, spusi Maia Sandu.

Ea li stipsi formaţiunile pro-arusi că s’ufilisescu di polimlu ditu Ucraina viţină cu cilăstăsearea ta s-u aspargă văsilia işiş şi ta s’anăkisească putearea. Multiplili crize, economică, energhetică, di securitati cari u afecteadză pot s’aibă şansa ti s-u tranşeadză ti totna dilemma mutrinda traseulu geopolitic pi cari R. Moldova lipseaşti s-lu acaţă. Avocat consecventu şi susta tru aderarea a llei la Uniunea Europeană şi protlu andrupătoru tru momentili di cumpănă economică, România aprăftăsi s’tragă tru proiectul ţi ari scupolu s’ducă Republica Moldova tru familia europeană nai ma importanti stati di pi continent.

Autoru: Stefan Stoica

Armânipsearia: Taşcu Lala