Parlamentul a Româniillei ndrupaşti Ucraina

Deputatlu Nicolae Miroslav Petreţchi cundille:“Năpoi aduţemu aminti că tru Ucraina băneadză tu numiru mari ună comunitate etnică românească, cari contribuie la avuţăllea şi diversitatea-a societatillei ucraineane şi easti ună vărtoasă apunti

Roxana Vasile, 01.03.2022, 14:06

Parlamentul a Româniillei condamnă cu sirţălle agresiunea armată babageană a Fediaraţillei Ruse contra ali Ucraină, preţedată di pricunuştearea di cătră Rusia a independinţăllei autoproclamatiloru entităţ separatisti ditu Doneţk şi Lugansk, părţă componente ali Ucraină. Plenlu andamusit a Legislativlui di București adoptă, luni, ună declaraţie pritu cari nu aproaki apufusitu purtaticlu iresponsabilu a Moscovăllei şi caftă dănăsearea ună ş-ună şi necondiţionată a agresiunillei militare, cum şi ritrădzearea a tutulor forţiloru ruse ditu Ucraina. Textul a declaraţillei fu ghivăsitu, pritu telefon, di Nicolae Miroslav Petreţchi, deputatu ditu Grupul a Minorităţlor Naţionali:

ʺParlamentul a Româniillei năpoi u spuni solidaritatea acutotalui cu Ucraina şi cu populu ucrainean confruntat cu agresiunea Federaţillei Ruse şi lu spuni ndrupămintulu tră s’da asistenţă uminitară a cetăţenilor ucraineni, inclusiv a persoaniloru cari aleg să s’arifugiadză pi teritoriul a Românillei.ʺ

Simbolistica a momentului easti cabaia mari: pi ningă aţea că Nicolae Miroslav Petreţchi easti reprezentantulu tru Parlamenul român al Uniunillei Ucraineniloru ditu România, el ghivăsi textul a declarațiillei di Sighetlu Marmaţillei, iu easti dusu tu unu ţentru di agiutor uminitaru tră arifugaţ. Neise românii s-ascumbusiră nica ditu prima dzuuă a agresiunillei a Rusiillei contra Ucrainăllei tra s’agiută bănătorlli a lor, oamini nistipsiţ, cari fug tru numir impresionantu ditu calea-a ostilităților și alegu ca arefugiu noica şi România. Impresionată di solidaritatea a românilor s-declară nica şi comisarlu european tră Afaceri Interne, dna Ylva Johansson, cari, luni, eara vinită tru România.

ʺDeclanşarea aputrusearillei ruse tru noaptea di 23 cata 24 şcurtu 2022 easti un atentat la bana şi mira a cetăţeniloru ucraineni cari vrură şi spună unu ndreptu fundamental tru iţi democraţie, respectiv ndreptul ta ş’aleagă calea işiş.ʺ – să spuni tru declarația-a Parlamentului di București, cari afirmă că, tora, dupu optu añi di la arăchearea paranomu a Crimeeiillei, Ucraina easti pidipsită tră alidzaerea a llei suvearană, Rusia vrănda riangrăpsearea a istoriillei şi riampărţarea a lumillei tru sferi di influenţă pritu acti di agresiuni niprovocate şi niantimilleati.

Deputatlu Nicolae Miroslav Petreţchi cundille: “Năpoi aduţemu aminti că tru Ucraina băneadză tu numiru mari ună comunitate etnică românească, cari contribuie la avuţăllea şi diversitatea-a societatillei ucraineane şi reprezintă ună vărtoasă apunti di ligătură anamisa di statili a noastri. Membrllii a comunitatillei etniţi româneşti fură şi suntu cetăţeni loiali şi fideli ali Ucraină, cari ş’akicăsescu borgili ţi lă si cadu pritu aestu statut. Isa-isa cumu tuţ alanţă cetăţeni ali Ucraină, au aştiptări hireşti şi legitimi ca ndrepturli a lor s’hibă acutotalui tiñisiti. Parlamentul a Româniillei u spuni căndăsearea că imnaticlu a Ucrainăllei pi calea a reformilori democratiţi, a statlui di dreptu şi a aprukearillei di Europa va s’dişcllidă calea ti băgarea tu practico a tutuloru aiştoru dezidiarati.ʺ

Parlamentul di București năpoi și spusi agiutorlu pănu di mardzina ti nădiili europeane şi euroatlantiţi ali Ucraină.

Autor: Roxana Vasile

Armânipsearia: Taşcu Lala