Parculu Naţionalu Ceahlău
Na hărsimu di kirolu multu mşeatu şi vă călismu adză tru Parculu Naţionalu Ceahlău.
Ana-Maria Cononovici, 24.05.2021, 19:49
Himu tu partea di cătă ţentru-ascăpitată a giudeţlui Neamțu, aproapea di calea națională DN12C cari leagă muniţipiul Piatra Neamțu di căsăbălu Gheorgheni.
Parculu Naționalu Ceahlău fu declaratu arie aviglleată tru anlu 2000 și iasi tu videală ca un arealu montanu cu ună mari diversitate di relief: pirguri, ace, chipiti calcaroasi, reliefu carsticu cu kipiti anţăpătoasi, spilei, cllei şi vălliuri, cu păduri, pădz și iarbă crehtă. Muntili Ceahlău, tru arada-a curi s-arădăpseaşti Parculu Naționalu Ceahlău, easti tru pareia ţentrală a Carpațloru Orientali şi easti un munti ţi nu ş-ari preaclle tru spaţlu românescu, avândalui hramu şi sărbătoari, ama şi multi leghendi şi pirmituseri. Niţi ună di piştireili a Ceahlăului nu u apreasiră ma multu imaghinaţia-a rapsodzloru populari andicra di Dochia şi Panaghia. Piştireaua Panaghiillei, ţi easti ninga chipita arămatâ a Toacăllei, s-analţă pirifană shi anyilcioasă tru aradzili a soarilui.
Ia ţi nă spusi Cătălin Gavrilescu, directorlu a Parcului Naționalu Ceahlău:
“Avânda tu videală că chirolu easti mşeatu, tru dzălili ţi yinu aştiptămu mulţă turişţă, suntu dişcllisi tuti traseele, ma pţănu toradioară Cascada Duruitoare-Dochia. Va-lli aştiptămu şi la Centrul di vizitari di la Izvurlu a Muntilui. Centrul di vizitari easti un ţentru intearactivu, ndreptu tru prinţipiu, tră cilimeaňi, elevi. Suntu şasi spilei tru miniatură, cari suntu ndreapti cu niscănti prusupidi şi cathi ună şi spuni leghenda, avem ună sală di ţinema 3D, tru cari au căbilea s-veadă un filmu di părăstiseari a Ceahlăului şi ună sală tră prăvdzăli di aoa şi ună tră cişitili di aoa.”
Ti muşuteţli ţi potu s-li veadă turişţălli aoa nviţămu tutu di la Cătălin Gavrilescu, directorlu a parcului:
“Prota ş-prota fisea, di itia că scărli fură dişcllisi nica di anlu ţi tricu. Ti mulţă turiştă, scărli spunu un mari sinferu, căţe alinarea pi Toaca aduţi dininti ună muşuteaţă ahoryea-a fisillei. Suntu trasee di ună săhati ică 4-5 săhăţ, turişţăllii potu tra ş-aleagă traseulu andicra di condiţia fizică a loru şi echipamentul cu cari suntu armătusiţ.”
Cătălin Gavrilescu lă feaţi timbihi a vizitatorloru sinfirisiţ s-nu nchisească pi trasee ma s-nu aibă ună bună condiţii fizică şi nu suntu buňi cu sănătatea, acă serviţiul di salvamontu easti hăirlăticu şi pitricu aestă căndăseari tu ahurhita di sezonu:
“U spunu vreari ş-tiňie că tuţ atelli cari nkisescu s-veadă Ceahlăulu lipseaşti s-tiňisească arădzli di videari, s-nu arucă cupriili şi s-tiňisească maşi traseeli!”
Cu nădia că va vă hărsiţ di munti şi muşuteaţa-a fisillei tru ună acutotalui sigurlăki, vă aştiptămu alantă aradă cu ună nauă destinaţie.
Autor: Ana-Maria Cononovici
Armãnipsearea: Taşcu Lala
