Păhălu a carburanţălor, compensat ma largu
Guvernul ali Românie prilundzi compensarea păhălui tră carburanță.
Leyla Cheamil, 30.09.2022, 20:14
Tru cadrul a misurlor di agiutari a populațillei, Executivlu di București apufusi, gioi, prilundzirea a vadilui tra s’da compensari tră păhălu la combustibili. Partenerlli ditu coaliţia di guvernare apufusiră ţănearea generală a compensarillei ti păhadzlli a carburanților ti nica trei meşi, dimi până la bitisita a anlui. Sumvenţionarea va s’hibă băgată tru lucru cu 50 di bani la naftă şi motorină. Ea eara tru lucru di trei meşi, di la 1 alunaru, și vrea s’bitisea tru dzuua ditu soni a meslui yismăciuni. Premierul Nicolae Ciucă diclară că easti ananghi di prilundzirea a aliştei compensari, tră s’contracariadză efectele negative a creaştirillei păhadzloru la naftă şi motorină ti nivelu di bană ali populaţie şi ti opearatorlli economiţ. El nica spusi că misura, ari adusă efecte, lucru cari fu vizibil tru treilli mesi ditu soni, di aprăftăsi, practic, stabilizarea nica şi scădirea a păhălui la combustibil. Ma multu, aestă apofasi adusi efecte pi tut şingirlu, di la furnizor pană la consumator.
Secretarlu di stat tru Ministerul Energiei, Dan Drăgan, diclară că operatorlli economiţ cari vindu nafta şi motorină cătră muştiradzlli finali, persoane fiziţi ică juridiţi, cata cum şi cătră operatorlli economiţ autorizaţ cari ancupără carburanţă ditu dipozite şi ditu staţii di distribuţie şi cari da ună ñicurari di 0,5 lei pe litru inclusiv TVA la păhălu di vindiari, au hăiri di la bugetlu di stat ti ună compensare di 0,25 lei litru, inclusiv TVA aferentă ti ñicurarea faptă. Tru kirolu di băgari tru lucru, operatorlli economiţ cari vindu naftă şi motorină va lu afişeadză păhălu cari includi aestă ñicurari di păhă, iara, tru sistemlu di gestiune şi la pompă, va s’hibă angrăpsitu păhălu di vindiari fără ñicurarea comercială, cundille Dan Drăgan. Uidisitu cu oficialu ditu Ministerlu ali Energie, tră proţlli meşi ti băgari a aliştei misură, impactul bugetar fu estimat la aproapea 600 di milioane di lei (circa 120 di milioane di euro), iara tră yinitorlli trei meşi, sumedru, brumaru şi andreu, autorităţli estimeadză idyiulu impactu.
S-cundillemu că, ñiercuri, păhălu ti motorină scădzu sum 8 lei pi litru, tră prota oară tru şasilli meşi ditu soni, ase că România ari, tru aestă oară, şasilu nai ma ñîcu păhă ditu bloclu comunitar. Trendul discendint acaţă linia pi cari s-angrăpsi, şi păhălu la naftă, agiumsi la 7,15 lei pi litru, tru scădiare cu aproapea 12 % andicra di maximul agiumtu tru meslu alunaru a aluştui anu. Tru toplu a văsiliiloru cu nai ma ieftină naftă, România easti, tru kirolu di tora, pi loclu 8 tru Uniunea Europeană. Cându Guvernul avea apufusită compensarea păhălui a carburanților, la bitisita a meslui cirişaru, nafta custusea 8,65 di lei/ litru, iara motorina ma multu di 9 lei.
Autoru: Leyla Cheamil
Armânipsearea: Taşcu Lala
