Omlu a Anlui 2022 la Radio România Internaţional
Vruţ soţ, Radio România Internaţional u dusi ma largu tradiţionala anchetă di opinie tu arada-a ascultătorloru şi ufilisitorloru di Internet ...
Eugen Cojocariu, 01.01.2023, 16:50
Vruţ soţ, Radio România Internaţional u dusi ma largu tradiţionala anchetă di opinie tu arada-a ascultătorloru şi ufilisitorloru di Internet ş-prit şingirili suţiali tra s’apufusească cari ditu personalităţli a prezentului alăsară toară nai cama multu tru anlu 2022, tru noimă pozitivă, tru lumi.
“Omlu a Anlui 2022 la RRI” fu aleptu, detaşat, prezidentulu ali Ucraină, Volodimir Zelenski.
Raffaele Ponticelli, ditu Italia, lu aleapsi «tră eroismul demonstrat emu di el emu di populu a lui, ti apărarea contra ali aputruseari arusească”.
Miodrag Ristić, ditu Sărbie, u spunea aestă giueapi: “Curayilu, iţrăllea, apufusearea suntu hărli a unlui omu, iara aestu easti prezidentulu ali Ucraină”.
“Alidzearea a mea easti prezidentulu ucrainean Volodimir Zelenski, cari fu ună inspirație tră populu a lui ti alumta contra ali aputruseari arusească“, ngrăpsi Christer Brunström, ditu Suedia.
Zelenski “ș-apără și cumăndusi ahătu ghini văsilia tru urutlu polimu contra a invadatorlui arusescu cari u asparsi fără ndriptati Ucraina, un polimu cari, avemu nădia tuț, că va s’bitisească cât ma ayoñea”, vini cu aestă minduită Miguel Ramon Bauset, ditu Spania.
“Personalitati harişi şi rezilientă, Volodimir Zelenski easti simbolu a rezistenţăllei a unlui populu dinintea a invadatorlor, a nădiillei ti democraţie, ti independenţă şi tră iriñe, easti simbolu a znuearillei politiţi”, ngrăpsi Maguy Roy, ditu Franţa.
“Zelenski ș-u cumănduseaşti văsilia fără s’hibă ndirsitu, intimidat di aţea ţi ari căbili s’hibă nai ma greaua hopă di la bitisita al Doilui Polimu Mondialu”, ngrăpsi Carsten Fenske, ditu Ghirmănie.
Nica eara alepţă tru harea di “Omlu a Anlui 2022 la RRI” populu ucrainean tru ansamblu, comandantul ali Armată ucraineană, ghenearalu Valeryi Zaluzhny, voluntarlli cari agiută oamiñilli zñiipsit di polimlu ditu Ucraina, jurnaliştilli, maxus aţelli di la posturli publiţi, cari da hăbări tiñisiti, alithealui ti polimlu ditu Ucraina, jurnalişti ditu tută lumea cari s’ncuntreadză ti polimlu ditu Ucraina, ama şi populu iranian, neise mllerli iranieani cari s’ncuntreadză ti regimlu teocratic.
Anamisa di liderlli pripuşi eara spuşi Papa Francisc, Văsillelu Charles al III-lea al Mari Britanii, ama şi llirtata Văsiloañe Elisabeta a II-a, prezidentulu ali Chină, Xi Jinping, prezidentulu rus Vladimir Putin, aţelu di ma ninti premier italian Mario Draghi, prezidentulu nturţescu Recep Tayyip Erdogan.
Nica eara pripuşi ti harea di “Omlu Anlui 2022”, ntră alţălli, năulu ficioru-thamă a anutarillei mondială, românlu David Popovici, starlu argentinian Lionel Messi, pareia ali Argentină, cari amintă Campionatlu Mondial di fotbal, şi pareia di la NASA tră lansarea-a Proiectului “Artemis”, cari ari tru scupo duţearea diznău pi lună a astronauţilor.
Ditu arada-a ascultătorlou a Emisiunillei Armânească di la Radio România Internaţional Nicola Vangeli di Skopia, Ripublica Macedonia ditu Araţili pripusi tru harea di “Omlu Anlui 2022”, pi năulu ficioru-thamă ali anutari mondială, românlu David Popovici.
Vă dămu ma largu cartea a domnului Nicola Vangeli:
“Tinjisits sots di la redacția armânească di la RRI,
Cafi an ninti di Cărciun shi di Anlu Nău alidzem Omlu a anlui. Ti aestu an, 2022, pripunirea mea easti David Popovici, tinirlu înotător cari aestu an adră recordu mondial shi alti rezultati cari lipseashti s-li adutsem aminti, easti campion mondial la 100 de meatri shi la 200 di meatri stil liber.”
Încljinăciunji a tutulor,
Nikola Vangeli
Haristusimu Doamni Nicola Vangeli ti pripunirea-a ta, ti colaborari şi ti ascultarea-a Emisiunillei Armânească di la RRI
Ncllinăciunj a ascultătorlou di Skopia !
Autoru: Eugen Cojocariu
Armânipsearea: Taşcu Lala
