Oaspit la microfonlu RRI – Flori Costea, volta Veria tu Gartie

Earam Veria la Corlu a Sutatal'ei di aclo deadun cu Elena Saricu Todica atea ti cumandusi Proiectul “Nveata armâneasti si Daniela Costea idyea eara tru pareia di lucru tu aestu proiectu.

Tașcu Lala, 05.02.2017, 17:35

Interviu: Florentina Costea ti volta la Sutsata a Armânjilor di Veria, dit Gãrtsie

REPORTER – Vrut ascultatori u’avem oaspita tu emisiunea a noastra di toraseara di la RRI di Bucuresti tin’isita Florentina Costea di Bucuresti dit Românie cari tru dzalili di ma nainti eara dusa volta tu Gartie la Sutata a Armân’ilor di Veria deadun cu Daniela Costea tut di la Sutata Armâneascã di Bucuresti si nica una soata Elena Saricu Todica tut di Bucuresti di la Sutata Armâneasca.

FLORENTINA COSTEA — Buna dzuua. Ghini v-aflaiu. Dealihea asi easti, earam Veria la Corlu a Sutatal’ei di aclo deadun cu Elena Saricu Todica atea ti cumandusi Proiectul “Nveata armâneasti” si Daniela Costea idyea eara tru pareia di lucru tu aestu proiectu.

REPORTER – Ndaua zboara ti cum s-dizvarti andamusea cu arman’il’i di Veria ti v-astiptara, minduescu, ca daima, cu mari harauua.

FLORENTINA COSTEA — Asi cum pistipsescu ca stie multa dun’eaua dit lumea armâneasca Sutata di Veria easti una sutata multu vartoasa si adara multu lucru tru partea aesta di taneari tru bana si a limbal’ei di dada, a gioclui si a canticlui armânescu s-ca daima, na astiptara cu multa miraki s-cu frandzali di inin’i discl’isi.

Na harsim multu di multu s-videm cum ahurhira prota cu barnul, di dip n’it, cari na ghinuira pi armâneasti deadun cu dhascalu a lor Taki Yioryiou.

Deapoaia pi arada vinira atel’i niheama cama marl’i tu ilikie di 14 — 17 di an’i si dip tu bitisita isira si atel’i cama tru ilikie di al’i stim ahat ghini di la Sutata di Veria.

Eara una harauua sa u mutresta pirifan’ea, s-la mutresta stran’ili, s-la mutresta turlia atea ahat museata tru cari alu duc corlu armânescu si cum dzasu, na harsim, multu di multu, sa-l’i videm iara si s-na spunem ponlu ti limba di dada, ti lucarli ateali ti na suntu ahat aproapea di inima s di lucarlu armânescu.

Tutnaoara adram niheama moeabeti s ti proiectul “Nveata armâneasti” la dusim, la durusim audiobookurli …ateali caieti di matimati cum si cartea al Alexandru Gica angrapsita pi armâneasti “Armân’il’i ….” . Cu aesta furn’ie voi sa-l’i spun ti multa an’i al Alexandru, aza easti dzuua a lui…

REPORTER — Dealithea s-na baneadza durutlu Alexandru Gica ti tut copuslu ti-lu fati la Sutata.

FLORENTINA COSTEA — Asi easti. Ti sa spun una mari harauua ca n-adunam aclo vinira s-alta armân’i, di la alti sutati armânesta, dit Gartie. Eara Costas Paramias cari adara matimati pi armaneasti tu hoara Deniscu.

Eara vinita si unâ parei di la Sutata a Arman’ilor di Athina cum s di la alti sutati, ti io nu-l’i steam ahat ghini, ma di cat avdzaiu eara si di la alti sutati armânesta dit Gartie.

REPORTER — Vidzum pi pareili di socializari pi FB ndaua secventi cu ndoi di n’itl’i ti cantara aclo, un ficior si una feata…

FLORENTINA COSTEA — E, e, aesta fu iara una mari harauua !

Ficiorlu al Dimitri Paraskos ti vini s’na canta ahat museat cu clarina. Ficiorlu a lui canta deadun cu feata al Dimitri Piskos, cantara armaneasti daua cantiti “Pilister lai pilister” si “Stau na dzuua tru livadi”.

Deapoaia fciorlu al Paraskos u batu niheama si clarina, afenda-su lu nvita si aestu lucru.

REPORTER — S-baneadza si s-calca pi torlu alu afendi…

FLORENTINA COSTEA — Asi easti, s-li duca, s-li duca, aesti cantiti ma largu, ca avem ananghi di ahtari cantatori.

REPORTER — Dealithea ! Haristusim tin’isita Flori Costea ti mseatili habari ti na li adut di Veria, dit Elada, va uram hairalaticu tru lucarlu a vostru deadun cu pareia, cu Daniela Costea si Elena Saricu Todica (ca deaneavra nu-n’ aduteam aminti numa a tin’isital’ei Saricu) si cum spuneam tra ninti lucarlu ti lu fatet.

Tru bitisita noi va s-durusim una frandza tru iholu a pareiil’ei “Via Balcanica” cu boatea a tin’isital’ei a noasta oaspita Florentina Costea.

S-na banedz deadun cu arman’il’i dit Elada, dit Românie s di pisti tut iu baneadza tru lumi !

FLORENTINA COSTEA — Hariosi s-va ved si lucarlu ambar ti tuta lumea !

REPORTER — S-avdzam masi ghineata ! Vrut ascultatori cum va taxim ma largu va s-avdzat una frandza muzicala cu oaspita a noasta di toraseara, Florentina Costea si Pareia “Via Balcanica” !

(Intra cantitli: “Feata armâna cu poala di lana” si “Hagi Steryiu Celnic Mari”)