Năi miniştri la Ministerlu a Lucărlui şi ali Familie
Bucureşti s-bitisi mini-remanierea guvernamentală.
Corina Cristea, 20.07.2023, 13:10
Nominalizate la ahurhita a stămânăllei di cătră PSD, protlu partid ali coaliție aflată la guvernare, tra s’cumăndusească ministerili ali Familiei şi a Lucărlui, deputatele Natalia Intotero și Simona Bucura-Oprescu deadiră guratlu ti intrari pi ipotisi, ñiercuri dupu prăndzu dituintea prezidentului Klaus Iohannis. Portofoliile avea armasă vacante stămâna tricută, după ţi Gabriela Firea şi Marius Budăi demisionară, tru contextul a căvgălui ligat di neregulile grave aflati tru ma multi ţentri rezidenţiale tra persoanele tu ilikie şi persoane cu dizabilităţ. Cama di 2.000 di ahtări ţentri fură verificate di autorităţ tru kirolu ditu soni, iara ndauă dzăţ- nai cama multi tru Bucureşti — fură ncllisi dupu tratamentili niumineşti constatati. Tru idyiulu kiro, fu curmată lucărlu la alti ndauă dzăţ şi fură dati amendză tru valoare di aproape 10 milioane di lei (circa 2 milioane di euro). Fură adrati și ndauă dosare penale, tră infracţiuni contra persoanei ică di natură economică, iar doi inspectori ali Agenţie Judeţenă tra Plăţi şi Inspecţie Socială Ilfov ncllişi di itia că nu feaţiră cum lipsea isapea la catandisea ditu ţentru di mutreari a persoanelor cu dizabilităţi. Viniră deapoa demisiile di la aţeali dauă ministere, demisii cari viniră după ţi titularllii zburără cu premierlu Marcel Ciolacu. Şeflu a Executivlui spunea atumţea că easti ananghi di asumare politică şi ditu partea a primarilor, a prezidenţăloru di consilii giudeţeane, a directorilor di instituţii locale ică a şefilor di poliţie, cari avură ligătură cu azilele cari fac subiectul ali anchetă DIICOT.
Tru idyiulu kiro, purtătorlu di zboru a PSD, Lucian Romaşcanu, spunea că, dupu controalili fapti la ţentrili tra persoane tru ilikie, lipseaşti ca şi alţăllii s’facă ună jgllioată năpoi. “Tru aestă oară, cadealihea easti s’mindueşţă că iuva borgea nu easti maş tru zona ministerială, ama easti şi tru zona autorităţlor locale. Cadealihea va si s’llia apofasi la nivel guvernamental, ama, tru idyiulu kiro, aţelli cari suntu aflaţ căbati, nai ma pţănu politic, cara nu şi administrativ, lipseaşti s’facă ună jgllioată năpoi. Easte un gest di nămuzi politică”, spunea purtătorlu di zboru a PSD. Toradioară, năilli miniștrii intrară pi ipotisi. Simona Bucura-Oprescu, aflată la treilu mandat di deputat ditu partea social-democraților, ari 43 di ani și easti năulu titular la ministerul a Lucărlui şi Solidaritatillei Socială. Ea ngrăpsea luni, pi un şingiru di socializare, că nomlu a pensiilor speciale, nomlu a pensiilor şi nomlu a tiñiiloru di cafi mesu suntu priorităţ a mandatlui a llei di ministru tra realizarea reformelor asumate pritu Planul Național di Redresare și Reziliență. Tru ilikia di 47 di ani, năulu ministru ali Familiei, Tineretului şi Egalităţii di Şanse, Natalia Intotero easti, idyealui, la treilu mandat di parlamentar ditu partea PSD.
Autoru: Corina Cristea
Armânipsearea: Taşcu Lala
