Muabeţ româno-ungare la nivel analtu
Ungaria și spusi andrupămintulu tră aderarea ali Românie la Spațiul Schengen pritu boaţea prezidentăllei Katalin Novak, tu vizita ofiţială faptă București.
Daniela Budu, 08.09.2022, 21:04
După ună vizită privată tru România cari adusi protestul a autorităților di București, prezidenta ali Ungarie, Katalin Novak eara, ñiercuri vinită ti ună vizită ofiţială tru România, prima la nivel di șef di stat tu aeşţă 12 ani ditu soni. Katalin Novak s-andămusi cu prezidentulu Klaus Iohannis, cu premierul Nicolae Ciucă, cum și cu șefañilliii a Parlamentului și cu liderlli UDMR. Aderarea ali Românie la Spaţiul Schengen, catandisea a maghiarilor ditu România, agiutarea a arifugaţloru ditu Ucraina, domeniul energiei şi dependinţa energetică eara protili teme abordate di aţelli doi șefi di stat.
Tru cadrul a discuțiilor, Klaus Iohannis u spusi tută disponibilitatea a autorităţilor di București tră colaborarea cu statul viţin. El năpoi adusi aminti ti simasia a dialogului tru andridzearea a chestiunilor di sinferu bilateral, cum şi a evitarillei abordărli unilaterale, cari nu pot s’aducă cearei durabile. Tru aestă noimă, Klaus Iohannis cundille că easti fundamental ca proiectele di interes s’hibă realizate tru România maş dupu un acordu, s’nu hibă discriminatorii pi thimellilu ali etniei şi s’hibă simfunu cu dreptulu român, european şi internaţional. Tutunăoară, șeful statului spusi că, tru România, ndrepturile a tutulor minorităţilor naţionale sunt tiñisiti, iara aestea suntu reprezentate tru Parlament.
Klaus Iohannis: “Easti interesul a nostru comun ca ndrepturile a minoritatillei maghiare s’hibă acutotalui tiñisiti. S’poată s-ăşi băneadză cultura, s-poată s’ufilisească limba maternă şi aşi ma largu. Şi, apropo, n’akicăimu că easti ghini s’ufiliseşţă şi limba română. Easte, di altă parte, un lucru cunuscut, că şi aoa şi annaparti ari politicieni cari vor s’iasă dininti, ufilisinda nţăpăturli intereetniţi.”
Tru arada a llei, Katalin Novak cundille că emu România, emu Ungaria, voru s’ñicureadză mintireaşili existente, neise s’nu lă da silă. Ea cundile că ateali dauă state viţini nu va s’hibă simfuni pănu di mardzină, ama nai important lucru easti s’poată să zburască şi s’ascultă unu alantu kivernisili. Tru plan extern, prezidinta ali Ungariei diadi asiguripseri că văsilia a llei andrupaşti adirarea ali Românie la spaţiul di liberă urdinari Schengen.
Katalin Novak: Feaţimu muabeti şi ti adirarea la zona Schengen ali Românie şi România poate s’bagă besă pi andruparea ali Ungariei tru aestă noimă. Prezidinta a statlui viţinu spusi şi atea că borgea ali Românie și Ungarie easti nvărtuşearea a boaţillei şi creaştirea a influenţăllei Uniunilli Europene, iara ateali dauă văsilii suntu etimi s’cilăstăsească diadunu tru aestă noimă. “Avemu ananghi di aofasi comune buni” – diclară Katalin Novák.
Autoru: Daniela Budu
Armânipsearea: Taşcu Lala
