Muabeț româno-americane
Miniștrilli români ali Apărari şi di Externe feaţiră muabeti, la telefon, cu omologilli a lor ditu SUA ti securitatea ditu regiunea ali Amarea Lae, tru contextul polimlui ditu Ucraina.
Leyla Cheamil, 19.04.2022, 18:49
Comunitatea internațională condamnă sertu aputrusearea ali Ucraina di cătră trupele ruse, cari adusi nai ma mare criză a arifugaţloru ditu Europa, di Doilu Polimu Mondial. Tră consecințele alistei agresiuni militare și eforturile aliate ta s’kivernisească şi s’da apandisi uidisitu avură muabeti, luni, la telefon, ministrul român di Externe, Bogdan Aurescu, și secretarul american di stat Antony Blinken.
Aţelli doi zburără tră modalităţile concrete tra s’da agiutoru ali Ucrain, cum şi tră ma multi aspecte di cooperare bilatearală ditu cadrul a Parteneriatlui Strategic România-Statele Unite. Bogdan Aurescu prezentă evaluările a Bucureștiului mutrinda evoluţiile di securitate pe flancul estic al NATO şi la Amarea Lae. Tutunăoară, li spusi minutişu acţiunile complexe a autorităţlor române tru agiutorlu ali Ucrainei viţină la nivel politic, logistic şi umanitar.
Şeful diplomațiillei di la București cundille importanţa ti băgarea tu lucru ntrăoară aapofasiloru di la summitlu extraordinar al NATO ditu 24 marţu, maxusu crearea accelearată a Grupului di alumtă tru România, ca protă jgllioată tră echilibrarea şi anvărtuşearea prezenţăllei NATO pe flancul estic pi lungu kiro. Di altă parte, el prezentă anănghiserli a Republicii Moldova, stat viţin la ascăpitată cu România, tră tra s’tănă keptu a efectelor crizei diclanşate pritu agresiunea rusă tru Ucraina şi tră anvărtuşearea rezilienţăllei aliştei republiţ cu populaţie majoritar ţi zburaşti română.
Tu arada a lui, secretarul di stat Antony Blinken pitricu haristuseri ditu partea a Statelor Unite tră rolu regional asumat di București şi tră agiutorlu datu a Kievului şi altor parteneri vulnearabili ditu regiune, inclusiv a Chișinăului. Ma multu, Antony Blinken alăvdă angajamentul constant a Româniillei, ca partener strategic al SUA şi aliat NATO responsabil şi di pistipseari, tră stabilitatea şi securitatea regiunillei ali Amarea Lae, ama şi la nivel european şi euroatlanticˮ. Oficialul american diadi asigurări că Washingtonul easti actutotalui angajat tru protejarea a teritoriilor a Româniilei şi a tutulor aliaţilor, maxusu a aţilor craturi cari suntu tru prima linie, aşi cum easti România.
Tut luni, ministrul Apărării Naţionale, Vasile Dincu, şi omologul a lui american, Lloyd Austin, zburără la telefon tră evoluţiile situaţiillei di securitate ditu regiunea ali Amarea Lae, tru contextul a polimlui ditu Ucraina, cum şi catandisea şi opearaţionalizarea Grupului di alumtă aliat ditu România. Vasile Dîncu haristusi a Statelor Unite tră angajamentul şi contribuţia consistentă tră asigurarea a securitatillei flancului estic al NATO.
Repoziţionarea batalionului Stryker, dislocarea a născăntoru avioane F-16 şi F-18 tră anvărtuşearea misiunilor di poliţie aeriană anvărtuşitătă tru România sunt maş dauă exemple concrete a soliditatillei tu relaţia transatlantică.
Autor: Leyla Cheamil
Armânipsearia: Taşcu Lala
