Muabeţ mutrinda paraimpozitarea a şingirlui ditu energie
Guvernul român ndreadzi paraimpozitarea agenţălor di pe păzarea energetică, ti cari spune că amintă amintati multu mări.
Ştefan Stoica, 29.08.2022, 13:27
Coaliţia di guvernare PSD-PNL-UDMR ş- pripusiră că, stămâna yinitoare, s’vulusească un act normativ pritu cari să-lli paraimpoziteadză producătorlli, intermediarlli şi furnizorlli di energie. Lidirlli ali coaliţie căftară a ministerului di Finanţe şi Autoritatillei Naţională di Reglementare tru Energie s’facă simulările anănghisiti şi aeastea s’hibă părăstisiti tu dzălili ţi yinu, di itia că, până pi 1 di yismăciuni, guvernul s’aibă pi measa di lucru un actu normativ cari să ndreagă di tamama turlia şi valoarea supraimpozitarilli. Personaj controversat, atacat nu maş di opoziţie ică di presă, că şi di partenerlli işiş social-dimocraţi tră turlia tru cari kivernisescu criza, ministrul Energiillei, libearalu Virgil Popescu, spuni tora că profiturile multu mări ditu domeniu lipseaşti s’hibă eliminate. El diadi ca exemplu intermediarlli, ti cari spune că maş ancupără ieftin di la producători şi vindu scumpu a consumatorilor.
Virgil Popescu “Nă mindumu multu di multu la ună impozitare ti tut şingirlu di producţie, intermediere şi furnizare. Tru gheneral, un impozit, ună taxă, nu easti apufusită di Ministerul Energiei. Noi putem s’dămu consultanţă pi comate di energhie, himu prezenţă tru grupurli di lucru, ama aclo, s’dzăţemu, lidirlli di proiect sunt Autoritatea di Reglementare tru Energie, cari ari tuti datili centralizate, şi Ministerul di Finanţe. Lipseaşti s’hibă cât ma corect şi cât ma sertu. Nu pot născănţă s’adară profituri multu mări şi alţălli s’li păltească. Impozităm pi tută lumea atumţea când suntu profituri multu mări. Şi păzarea di energie electrică, tru născănti zone, faţi profituri multu mări. După mine, un intermediar di energie electrică ică di gaze naturale nu lipseaşti s’amintă multu di ndauă procente. Ia şi vindi, nu faţi altuţiva.”
Ministrul Popescu nica spusi că, tru toamnă, guvernanţăllii va s’apufusească ţi va si s’facă pi păzarea energetică după 31 martie 2023, dată până la cari easti tru lucru ordonanţa di urgenţă ţi plafoneadză păhadzlli la energie electrică şi la gazele naturale. Tru aestu kiro, pi continent crescu boţli cari u stipsescu Rusia că, după ţi u aputrusi Ucraina, ufiliseaşti exporturile di hidrocarburi ca ună armată, tră s’arăzbuna tră sancţiunile băgati di occidintali. Ditu ună văsilie ţi un kiro eara neutră şi di arada nviţată s’aibă emburlăki cu aruşlli, cancelarlu austriac, Karl Nehammer, căftă ali Uniuni Europene “s’ampartă păhălu ali energie electrică di aţelu a gazelor”, tra să scadă facturile la curent. Şeflu a guvernului conservator di Viena spusi că subiectul lipseaşti s’hibă zburătu tru ună andamasi di ananghi şi că “păhălu ali electricitati lipseaşti să scadă”, iara prezidintulu rus, Vladimir Putin, numata lipseaşti s’hibă alăsatu s’apufusească cafi dzuă tru loclu a europenilor. “Lipseaşti s’dănăsimu aestă nibunille cari agudiaşti tru aestu kiro păzărli di energie” – cundille Nehammer.
Autoru: Bogdan Matei
Armânipsearea: Taşcu Lala
