Medalii mondiali tră canotajlu românescu
România bitisi pi loclu patru Campionatili Mondiali di Canotaju di Belgrad, cu ţinţi medalii amintati, ditu aestea dauă di malămă, aestă turlie scalifică 11 di echipaji la Agiocurli Olimpiţi ditu 2024 di Paris.
Sorin Iordan, 12.09.2023, 00:43
România bitisi cu iho di mari vazi Campionatlu Mondial di Canotaj, cari anlu aestu s-dizvărti Belgrad, tru Sărbie. Tru dzuua ditu soni ali compitiţe, sportivlli români amintară dauă medalii di malămă.
Protlu amintaticu lu-avură tu antriţearea diplo vâsli pareia di feati. Românţili Ancuţa Bodnar şi Simona Radiş, campioanili olimpiţi en titre, să spusiră cu livindeaţă, dinintea-a pareiloru ditu Lituania şi Statili Unite ali Americă, cari bitisiră pi locărli doi, respectiv trei. Vini deapoa oara di mari livindeaţă a pareiillei di optu şi nica ună a featiloru. Tru prova văsilikească ali compitiţie, varca românească ţi ankisi cu pareia adrată ditu Magdalena Rusu, Roxana Anghel, Adriana Adam, Iuliana Buhuş, Mădălina Bereş, Amalia Bereş, Maria Tivodariu, Ioana Vrăceanu şi Victoria-Ştefania Petreanu antricură vărţăli a pareiloru ditu Statili Unite ali Americă şi Australia, cari agiumsiră pi aestă aradă, sclleamă doilu şi treilu locu pi podiumu.
Sportivlli români, nu eara, dotu haristusiţ s’yină acasă maş cu medaliile ditu nai ma scumpulu metal. Sâmbătă, pareia di patru rame featili, adrată ditu Mădălina Bereş, Maria Tivodariu, Magdalena Rusu şi Amalia Bereş, amintară asimea, a deapoa pareili di rami diplo a featiloru, Ioana Vrînceanu şi Roxana Anghel, a deapoa pareia di feati diplo adrată ditu, Mariana-Laura Dumitru şi Ionela Cozmiuc, amintară medaliili di brundzu/ di tungi.
La fciori, pareia di optu ş-nica unu ali Românie amintă paturlu locu, dupu pareili a aţiloru ditu Marea Britanie, Olanda şi Australia şi, acă nu amintă medaliili, s-califică ti Agiocurli Olimpiţi di Paris. Cu niheamăză kiro ninti di nkisita ali compitiţie ditu Sărbie, prezidentulu ali Federaţie Română di Canotaj şi caplu ali Agenţie Naţională tră Sportu, Elisabeta Lipă, ţi agiumsi s’hibă protlu canotor ditu lumi cari amintă optu medalii olimpiţi, spunea că scăpolu ali federaţie ti antriţearea mondială di Belgrad easti calificarea-a ma multiloru parei di canataju tră Agiocurli Olimpiţi di Paris.
Tutu cu tutu, România agiumsi cu 11 ditu aţeali 13 di parei a llei ţi s’calificară ti compitiţia sportivă cari va s’ţănă anlu ţi yini tru capitala ali Franţă tru vahtea di kiro 26 di Alunaru-11 di Agustu. Tu ediţia di ma ninti a Agiocurloru Olimpiţi, a curi nicukiru cu ndridzerli eara Japonia, canotajlu românescu amintă trei medalii – ună di malămă la diplo văsli pareia di feati şi dauă di asimi la diplo rame şi patru rami la ficiori neise şi bitisi pi paturlu locu tu planlu a proviloru tuti ţis’ţănură, neise ţi eara tu programulu. Cu aţeali ţinţi medalii amintati la Mondialili di Canotaju ditu Sărbie, România bitisi pi paturlu locu, hiindalui antricută maş di Olanda, Marea Britanie şi Italia. Anlu ţi tricu, la Campionatili Mondiali di Račice, tu Cehia, România amintă patru medalii di malămă tru provili di simplu vâsli pareia di feati, diplo rami pareia a fciorloru, diplo vâsli pareia a featiloru di optu ş-nica ună pareia di feati.
Autoru: Sorin Iordan
Armânipsearea: Taşcu Lala
