Malămă mondială tră anotlu românesc
Românul David Popovici amintă medalia di malămă, tru proba di 200 meatri liber, la Campionatele Mondiale di nataţie di la Budapesta.
Daniela Budu, 21.06.2022, 21:42
Românul David Popovici easti năulu star a anotlui mondial, după ţi, luni seară, amintă proba di 200 di meatri libir, la Budapesta, iu s’dizvărtescu Campionatele Mondiale. Timpul a lui fu di 1 minut, 43 di secundi și 21 di sutimi, atea ţi reprezintă un nău recordu mondial di juniori. Popovici, cari ari maş 17 ani și easti dibutantu la Mondialele di seniori, adusi asi protlu titlu mondial tru bazin olimpic tră anotlu masculin românesc. Țara noastră nica avea până tora dauă medalii di malămă, amintati di Tamara Costache (la 50 di meatri liber, tru 1986) şi Diana Mocanu (200 di meatri spate, tru 2001). Isapea a Româniillei la Mondiale easti tora di trei medalii di malămă, una di asimi şi şase di brundzu.
Tinirlu David Popovici, cari easti legitimat la Clublu Sportiv Dituamo ditu București, avu dupu năsu pi loclu doi tru finală sud-coreeanlu Sunwoo Hwang, și britaniclu Tom Dian. Presa română angrăpseaşti că Popovici ș-lu yiñisi statutlu di mare favorit la Mondialele di Natație ditu Ungaria. Comentatorlli britaniţ ali competiției intuiră victoria a năului fenomen ali natație mondială: Nu pistipseamu că va sam vărăoară emoții tru ţi mutreaşti recordulu mondial tru probele di 100 și 200 meatri libiru. Tora, cu David, avem!”, spunea acești nintea a cursăllei di luni seară.
Triumful al Popovici easti cu ahât ma impresionant cu cât lu divansă pe Tom Dian (22 di ani), campion olimpic la Tokyo tru aestă probă. Aclo, Popovici s-clasă pi locul 4, la ñică distanță di protili 3 locuri. Publicația americană Swimming World Magazine lugurseaşti că easti idyealui talentat catacum Michael Phelps și Ian Thorpe, doi monștri sacri tru lumea ali natație.
Popovici agiumsi tru menga a publicului tru alunaru 2021, cându amintă tru Italia titlul european di juniori la 100 meatri liber, cu un timpu excepţional, haristusită a curi s’califică la Jocurile Olimpiţi di la Tokyo, spuni Digi24. El fu votat și ti nai ma bun tiniru sportiv ditu Europa, tru 2021, di fu tiñisitu cu premiul Piotr Nurowski. Ceremonia s’feaţi la Samorin, tru Slovacia, la Adunarea Generală a Comitetilor Olimpiţi Europene.
Gazeta a Sporturilor aduţi aminti că timpul anăkisitu di David Popovici la Budapesta easti patrlu ditu istoria a probăllei di 200 di meatri liber. Maş Paul Biedirmann, atelu ti ari recordulu mondial, și legendarllii Michael Phelps și Yannick Agnel avură performanțe superioare. Reușita al Popovici easti nai ma bună tru dikeniul ditu soni. Oamiñilli di acasă avură pistusini tru mine! Medalia easti tră elli”, diclară sportivul român ună ş-ună după victorie.
Tră David Popovici easti maş prima competiție importantă a aliştei veară, el tu yinitu va s’llia parti și la Europenele di juniori di la Otopeni, România, (5-10 iulie), la Campionatili Europene di la Roma (11-17 august) şi la Mondialele di juniori di la Lima (30 august – 4 yismăciuni).
Autoru: Daniela Budu
Armânipsearea: Taşcu Lala
