Lucru deadunu ti Ucraina
Catastisea ditu Ucraina easti pi aghenda a moabețlor a ministrului român ali Apârari cu omolodzlli britanic ș-georgian, ama ș-tu mesea a moabețloru di Washington a prezidentului Klaus Iohannis cu liderlu di la Casa Albâ.
Tașcu Lala, 12.05.2024, 22:06
Anda fu Bucureşti, ministrul britanic a forţilor armati, Leo Docherty avu moabeț ți li luyursi „di simasie şi pozitive” cu omologlu a lui român, Angel Tîlvăr, ș-cu şeflu a Statlui Major ali Apărari și âlli vizită pi militarilli britaniț di la Baza Mihail Kogâlniceanu.
Ufițialul britanic zburâ ti ligâturli vârtoasi anamisa di ațeali dauâ stati, „lucurlu fârâ dânâseari” ali Românie tu NATO, ama și copuslu deadunu ti andruparea ali Ucrainâ. „Nu easti zborlu maș ti securitatea a Ucrainâllei, ama ș-ti securitatea a reghiunillei ali Amarea Lai. Lucurlu deadunu ti fâțearea ma bunâ a securitatillei la Amarea Lai easti di simasie, nu maș ti ațeali dauâ craturi, ama ș-ti tutâ reghiunea, cata cumu ș-ti tutâ lumea, ma s-acâțămu tu isapi cantitatea dipu mari di yiptu, ama ș-alanti ligâturi icunomiți ți s-facu la Amarea Lai”, dzâsi ministrul britanic ș-feați tâmbihi că 2024 easti unu anu multu importantu ti mira a polimlui anchisitu di Arusia ş-că evropeañilli au borgea ta s-u agiutâ Ucraina.
Ti catastisea di securitati reghionalâ pi fondul a polimlui di agresiuni ali Arusie tu Ucraina, ministrul român a Apărarillei zburâ, tut București, ș-cu omologlu georgian, Irakli Chikovani.
“Tu Evropa Chentralâ şi di Apiritâ, România easti unâ paradigmâ tu ma multi dumenii – di la apârarea a Partillei di Apiritâ ali NATO, la ânvârtușearea a democraţillei, a ndrepturlor a omlui ş-a statlui di ndreptu”, dzâsi, pi di altâ parti, Washington D.C., prezidentul Klaus Iohannis, anda apruche premiul Distinguished International Leadership a Consiliului Atlantic. Liderlu di București cundille că nai ma multili vâsilii soați pi Partea di Apiritâ ahurhirâ s-adarâ jgllioati trâ ninti tu criștearea a bugetilor ti Apârari ş-tu modernizarea a infrastructurillei ş-a echipamentilor militari.
“Vâsiliili a noasti avurâ capațitatea s-lucreadzâ deadunu, cu mucaeti și s-hibâ unâ forţâ vârtoasâ di descurajari contra a expansionismului arusescu ș-tu idyiul chiro armasi tu arada a axiiloru a noasti democratiți transatlantiți fundamentali”, dzâsi nica Klaus Iohannis. Elu cundille că România „fu tu prota linie pritu gairețli a llei ti agiutari ali Ucrainâ” ș-adusi aminti că, cama di 7,5 miliuni di ucraineni tricurâ sinurlu tu Românie câftândalui apanghiu, siguranţâ ş-libirâ urdinari.
“Vârâ 40 di ñilli di fciori ucraineani anveațâ tora tu sculiili româneşțâ. Miliuni di toni di asistenţâ umanitarâ tricurâ tu Ucraina pritu ş-ditu Românie. România agiută, tutnâoarâ, Ucraina s-ţânâ unâ linie icunomicâ vitalâ, dândalui axii a ligâturlor a noasti uniți și s-agiutâ trițearea a vârâ 40 di miliuni di toni di yiptu – anvârliga di 70% ditu exporturli di yiptu ucrainean, pritu porturli româneşțâ di pi Dunâ ş-di pi Amarea Lai”, dzâsi nica prezidentul Iohannis.
Iara tuti aesti gaireț „va s-ducâ ninti, câtu chiro va s-hibâ ananghi”, câțe România easti conştientâ di „rollu clleai” ți lu ari tu agiutorlu ti Ucraina ta s-azvingâ și s-aducâ irinea, „ta s-apruftuseascâ icunomic şi s-integreadzâ tu UE”, dzâsi liderlu di București.
Autor: Corina Cristea
Apriduțearea: Mirela Sima Biolan
