In Memoriam – prof.dr. KATHARINA BARBA (21.01.1927 – 21.01.2018)
Cu dureari tu suflitu vã dãm hâbarea lae cã aseara tahina u lirtã Dumidzã Freiburg tu Ghirmãnie prof. dr. Katharina Barba nicukira a lirtatlui prof. dr. Vasili al Barba. Dumnidzã s-u liartâ !Arãpasu lisor ninga dãrutlu a lei nicukiru Vasili al Barba !
Tașcu Lala, 23.01.2018, 13:25
In Memoriam — prof.dr. KATHARINA BARBA (21.01.1927 — 21.01.2018)
Vrut armân’i,
Cu dureari tu suflitu vã dãm hâbarea lae cã aseara tahina u l’irtã Dumidzã Freiburg tu Ghirmãnie prof. dr. Katharina Barba nicukira a l’irtatlui prof. dr. Vasili al Barba. Idyealui cum tin’isita scriitoari Kira Iorgoveanu Mantu loai aesta hãbari di jeali di la cusurina Cristina Neagu di Freiburg cari va nã dimândã dzãlili ti yinu ti arãdzli di ngrupari a l’irtatãl’iei prof. dr. Katahrina Barba.
Dumnidzã s-u l’iartâ !
Arãpasu lisor ninga dãrutlu a l’ei nicukiru Vasili al Barba !
Dumidza sa-u VEAGL’E preacl’ia Katharina si Vasili al Barba di goadili ti nica s-azâ lâ si fac AMA si a atilor ti suntu tu bana si eara parti di Pareia di Freiburg cu Amintarea ali Recomandari / Dimãndarea 1333 !
Cum ghini spunea un poet:
“…alasâ sâ scoatâ altâ unã carti ma bunã di a mea !”
Eo va sâ spun ti arâzbunarea a l’irtatâl’iei preacl’e BARBA ma si a atilor ti suntu tu banâ si eara parti dit Pareia di Freiburg:
“…alasã sã scoatâ altãl’i nu unã Recomandari/ unã Dimãndari 1333, ma un NOM 1333 s-atumtea va neg la Mirmintâl’i “Sta Vinirea” di Bucuresti, Românie iu s-ari arãpasu Vasili al Barba, tora s-cu nicukira a lui Katharina sâ-l’i spun câ ARMANAMEA ANKIRDASI !
Cu anvirinari, Tascu Lala
Ma nghios avet un In Memoriam – KATHARINA BARBA anyrapsitu di poeta Kira Iorgoveanu Mantu tu Fimirida electronia dit FB “Armanamea trã Europa” :
KIRA MANTU:
KATHARINA BARBA — In memoriam
21.01.1927 — 21.01.2018
Cu-nvirinari lomu hâbarea câ dna Katharina Barba n-alâsă…
Adzâ lomu tilifonea sâ-l’i urămu ti dzuua di amintari.
N-apândâsi Cristina, feata l’ei… si nâ deadi nvirinata hâbari.
Ti pot s-anyrâpsestâ ti unu omu cari lu cunuscusi aproapi 30 di an’i, cu cari lucrasi si tricusi deadunu, tu aestu lucru, ahânti sticuri di banâ museati, mplini di harauâ ?
Katharina Barba fu nicukira a marilui patriot armânu Vasili Barba.
Unâ doamnâ cu purtaticu aleptu, cu sumuarâslu mplinu di akicâseari si mintiminlâki… Analtâ, museatâ, pirifanâ!
Katharina Barba easti cunuscutâ tu lumea a lingvistâloru trâ lucurlu-a l’ei di profesoarâ ghirmanâ …
Ama trâ noi, Armân’il’i, numa ali Katharina Barba s-leagâ di lucurlu ti lu feati,
cama di yinyit an’i, la Uniunea trâ Limbâ si Culturâ Armâneascâ di Freiburg.
Trâ tin’ia a fumeal’iei si-a farâl’iei tu cari intră, Katharina Barba anvită limba armâneascâ cu vreari si cu akicâseari… Si, ti multâ Armân’i fu unâ ciudii si harauâ s-u avdâ cu câtâ musuteatâ azbura limba a nicukirlui a l’ei!
Nu ptâni ori nâ pirmithusea dna Katharina ti socril’i a l’ei, cumu u tin’isirâ si cumu ea lâ turnâ tin’ia anvitânda armâneasti…
Nu fu congresu armânescu i congresu internatiunalu la cari Katharina Barba s-nu-agiutâ, nu masi cu suflitlu, ama si cu lucurlu: apridusi tu limba ghirmanâ litiraturâ armâneascâ si tuti cărtâli pitricuti di la ULCA la organismili evropeani i internatiunali cari agiutarâ la pricunustearea a Armân’iloru ca populu cu limbâ si culturâ ahoryea.
Discl’isi usi, feati ligâturi cu oamin’i anvitat, cu politician’i ghirmani si evropean’i, cu tin’ia-a l’iei di profesoarâ ghirmanâ, ama, tra-amintaticlu-a Armân’iloru!
Cu furn’ia atiloru 5 Congresi internatiunali ti Limba si Cultura Armânâ, (Mannheim, 1985 si Freiburg, 1988, 1993, 1996, 1999 ) si atiloru 3 cursuri internatiunali di limbâ armânâ (Freiburg, 1986, 1988 si Bonn, 1987) multâ armân’i avurâ haraua s-u cunoascâ si sâ zburascâ armâneasti cu Katharina Barba.
Tu aestâ oarâ, nâ trecu tu minti musatili uspeturi tu casa a loru, cu câtâ miraki n-astipta daima pi measâ…
U vidzumu dna Katharina cathi anu, la misăili andreapti ti nicukirlu a l’ei…
Ea avea armasâ, tora, singura ligaturâ a noastâ cu Freiburg — câsâbălu iu prof. Vasili Barba ahurhi minarea mudernâ armâneascâ!
Câsâbălu iu tricumu cama di 20 an’i di lucru, antribări, apandasi, astiptări, anvirinări, ama s-multâ, multâ harauâ ti amintaticlu a Armân’iloru — “Recomandarea/ Dimândarea 1333!
Dumnidzâ s-u l’iartâ si s-u curdiseascâ ninga nicukirlu a l’ei vrutu si tin’isitu !
Kira & Yiani Mantu
21.01.2018
RRI – Sectia Armaneasca
Reporter Tascu Lala
