Hăbări ditu bana românească şi internaţională

Premierlu Marcel Ciolacu eara dusu, adzã, Israelu; Marcel Ciolacu: România armãni un statu consecventu tru cadurlu a ligãturloru a llei ditu Orientulu di Mesi Mesi.

Newsroom, 17.10.2023, 21:24

România armãni un statu consecventu tru cadurlu a ligãturloru a llei ditu Orientuluu di Mesi şi easti cu idyea minduitã neise ta s’pingã ninti iriñea, a deapoa, va-lli ndrupascã, fãrã alti cãftãri, tru greulu kiro, aliaţlli a llei, hãbãrisi marţã protlu-ministru Marcel Ciolacu, tu bitisita ali andamasi ţi u avu cu omologlu israelianu Benjamin Netanyahu.

“România armãni un stat consecventu tru cadurlu a ligãturloru a llei ditu Orientuluu di Mesi Mesi. (…)

Himu cabaia gãilipsiţ ti sila ţi u loarã prişcãviili, cu zñii lãhtãroasi tu arada-a bãnãtorloru, emu a israelieañiloru, emu a palestinieañiloru.

Voi s’lli-asiguripsescu româñilli ditu vãsilia-a noastră că himu cu idyea minduitã neise, s’dãmu silã, tra s’pindzemu ninti iriñea, ama, va s’ndrupãmu fãrã alti cãftãri tu lãhtãroslu kiro aliaţllii şi soţlli a noştri”, cundille Marcel Ciolacu.

Vizita-a primlui ministru românu tru Israel yilipseaşti suţata ţi u-ari cu populu israelianu, dupu atacurli teroristi nkisiti di Hamas.

“Apufusiiu s’yinu adzã Israel di itia cã, tru unu ahtari greu kiro, cata cum aţelu ţi-lu-tricu populu israelianu, partenerllii şi soţlli lipseaşti şi spunã unu-alantu suţãllea anamisa di elli.

Suţiitatea românească, comunitatea di israelieañi ditu România şi aţea di româñi ditu Israel suntu nvirinaţ, deadunu cu dumnillili a voasti domnule prim-ministru, victimili ţi dotu nu au stepsu, mulleri, cilimeañi, tiniri tu crehta ilikie, dupu atacurli teroriste nkisiti di Hamas.

Himu nvirinaţ ti oamiñilli ţi kirurã şi aţelli mulţãlli pliguiţ, ditu arada-a aluştoru avea şi cetãţeañi di arãzgã româñã”, spusi Ciolacu.

România condamnă sertu ateali ţi s’feaţirã tru Israelu tu dzãlili di tu soni,

“Livelu a fãnicadzloru, ţi-lli feaţi Hamas, unã parei teroristă cari-lli ţãni sclayi bãnãtorlli palestinieañi ta s’bagã tu practico sinferurli a llei extremisti.

Tru aestã noimã, Parlamentulu ali Românie fu protlu foru leghislativu ditu arada a statiloru dimocratiţi cari apufusi tu unã andamasi comună unã diclaraţie di solidaritati cu statlu israelianu.

Deadunu cu comunitatea internaţională, România caftă s’hibã silighiţ tuţ ostatiţlli şi bãnãtorlli arãkiţ şi s’tragã mãnã di iţi actu fuvirosu, maxusu contra a locãrãloru ţivili”, declarã Ciolacu.

Caplu a Executivlui di Bucureşti spusi tru arada-a muabeţloru ţi li-avu cu premierlu israelienu că, dinintea-a atacurlor Hamas, Israelu ari ndreptul si s’apãrã, simfunu cu ndreptulu uminitaru şi feaţi cllimari ta s’da izini ti dişcllideari cãlliurli uminitari ditu Gaza.

“Escu cãndãsitu cã tutã comunitatea internaţională va s’cilãstãseascã ti dişcllidearea-a cãlliurloru uminitari ta s’hibã asiguripsitã asistenţa ti cari au ananghi arifugaţlli”, declarã Ciolacu.

Premierlu românu dimãndã haristuserli a lui ti omologlu a lui israelianu, mutrindalui cilãstãsearea-a autorităţloru israelieani şi ti agiutorlu ţi-lu-deadirã trã turnarea tu patridã, tu sigurlãki, a aţiloru cama di 2.200 di cetăţeañi româñi ditu Israel şi nãpoi spusi cã “easti di mari ananghi şi ntrãoarã” unã iriñe pi lungu kiro tru Orientulu di Mesi.

“Andrupãscu gaereţli deadunu ti purtarea tru sigurlãki a cetăţeañilor români ditu Cumata Gaza, ş-deapoa ahtãri sticuri di oarã vãrnãoarã s-nu triţemu” adãvgã Ciolacu.

Tu arada-a lui, Premierlu israelianu Benjamin Netanyahu dimãndã a omologlui a lui românu, Marcel Ciolacu, haristuseri ti solidaritatea ţi u spusi România andicra di Israelu dinintea-a atacurloru Hamas. Lumea tiñisitã lipseaşti s’hibã adunatã stogu anvãrliga di Israelulu şi s’alumtã ti curmarea a minarillei Hamas, spusi Netanyahu. Şi deadi asiguripseri că autorităţli israelieani va ‘facã tutu ţi s’poatã ta s’agiutãti purtarea-a a româñilor ditu Cumata Gaza, ahãtu cãtu va s’hibã di cãuli/posibilu.

“Vãrnu nu poati s’hibã tu iriñe cu Dash, vãrnu nu poati s’facãiriñe cu Al Qaeda şi vãrnu nu poati s’facã iriñe cu naziştilli. Elli lipseaşti s’hibã azvimţã, atumţea va s’avemu iriñe”, spusi Benjamin Netanyahu.

Tu delegaţia-a Româniillei tru Israel nica suntu ministrul Apărarillei Naționalã, Angel Tîlvăr, ministurlu Afacerlor Externe, Luminița Odobescu, diputatul Silviu Vexler, prezidentulu a Federațiillei Comunitățlor Evreiești ditu România, și ambasadorlu ali Românie tru Israel, Radu Ioanid.

Autoru: Udãlu a Hãbãrloru

Armânipsearea: Taşcu Lala