Hăbări ditu bana românească şi internaţională

Forțele ruse nkisiră sâmbătă ună nauă atacă coordonată și di artilerie tu ma mulţă căsăbadz ucrainene, inclusiv tru capitala Kiev, iu fură raportate focuri di armă și explozii aproapea clădirilor guvernamentale, uidisitu cu rapoartili a martorilor oculari

Newsroom, 26.02.2022, 18:47

POLIMU TU UCRAINA – Forțele ruse nkisiră sâmbătă ună nauă atacă coordonată și di artilerie tu ma mulţă căsăbadz ucrainene, inclusiv tru capitala Kiev, iu fură raportate focuri di armă și explozii aproapea clădirilor guvernamentale, uidisitu cu rapoartili a martorilor oculari și a oficialilor armatăllei ucrainene. . Alumti greale s’da și tru sudul Ucrainei, la Mariupol, Herson, Mykolaiv și Odisa, dimăndă un consilier a președituției ucrainene. Uidisitu cu izvurli ruse, armata rusă prilo controlu mplin tru Melitopolu și a hidrocentralei di la nordu di capitală. Volodymyr Zelensky spusi că aliațllii a lui continuă s’livreadză arme și nu apruke informațiile false ţi spunu că ari căftată ali armată să s’prida. Ambasadorul Ucrainei tru Israel diclară tră CNN că președitutele ucrainean ălli căftă a premierului israelian, Naftali Bennett, s’hibă nicukirlu și s’agiută la medierea negocierilor cu Rusia. Uidisitu cu datili oficiale publicate di autoritățile di la Kiev, aproapea 200 di ucraineni fură vătămaţ tru atacuri, inclusiv trei cilimeañi. Cama di 1.200 di persoane fură pliguiti ditu care 33 sunt minori. SUA și UE băgară viniri sancțiuni ti prezidintulu rus și ministrului di externe rus. Ma multu, NATO dimăndă ca va s’da ma largu armati a Kievlui și ș-ascumbusi forța di apandisi rapid pe flancul estic a Alianțăllei.

NATO – Franţa va s-rialoca 500 di militari NATO tru România ca apandisi la invazia Ucrainei di cătră Rusia, spusi şeful di stat major francez, Thierry Burkhard. NATO apufusi ta ş-anvărtuşeadză prezența pi flancul estic și s-transmită un mesaj vărtos di solidaritate strategică prit disvărtearea di forțe tru România, spusi generalu Burkhard, adăvgânda că și personalu NATO ali Franță tru Estonia va s’hibă anvărtuşitu ninti di vadi. Tru idyiulu kiro, Portugalia va s’da silă ti disvărtearea a infanteriilleei a llei tru România, ca parti a operațiunilor NATO programate inițial tră a daua giumitate a anlui. Portugalia va s’agiută, tutunăoară, s’aproaki arifugaţ ucraineni pritu darea di vize di urgență, relateadză agenția di presă EFE. Premierul Antonio Costa diclară tru un briefing di presă la bitisita-a summitului NATO că aestu batalion di infanterie ari 174 di militari și va s’nkisească tru România tru yinitoarele ndaua săptămâni”.

ARIFUGAȚ – Tru România, autoritățle și societatea civilă s’coordoneaDză tră s’agiută persoanele care fug di polimlu ditu Ucraina. Fu adrata una parei di lucru cari lucreadză cu Dipartamentul tră Situații di Urgență și cu ONG-urile implicate pe teren, diclară premierul Nicolae Ciucă. Apropea 20.000 di arifugaț ditu Ucraina tricură tru România di la ahurhita-a invaziillei ruse, majoritatea mlleri și cilimeañi. Tu kirolu anda hotelurile și pensiile agiungu paracălbălăki iruşi tru nord și nord-est, asociația di voluntari să spusi etima s’aproaki oameni, inclusiv tru a loru casi. Oamiñilli și ONG-urile s-ascumbusiră nica di la ahuhrita a polimlui și adrară măcare, apă și cafei caldă și ceai tră arifugațllii care trec sinurlu. Cruţea Âroşe la sol, amparti alimente și produse di igienă personală diadunu cu un mare retailer. Listele cu numerele di telefon esențiale suntu ampărţăti a arifugiaților, kiro tu cari voluntarllii dişcllisiră sisteme di ncărcare a telefonului și rețealili locale Wi-Fi aproapea di sinuru.

COVID-19 – Aproape 7.200 di cazuri noi di infecție cu COVID-19 și 101 dicese asociate fură raportate sâmbătă, dimăndă Grupul tră Comunicare Strategică. Nai multe ditu aeste cazuri fură raportate București, undi rata di incidință este tru scădire. Campania di vaccinare ayălisi, a diapoa ti aesta, autoritățile ncllisira ma multe centre ditu țară, reducânda tru idyiulu kiro programul di lucru la altili. Nai ma mare numir di infecții ndzua cu Covid fu raportat tru perioada 1 şcurtu – 40.018.

Autoru: Udălu a hăbărloru

Armânipsearea: Taşcu Lala