Grup di alumtă NATO tru România
NATO ş-anvărtuşeadză prezenţa militară tru România.
Bogdan Matei, 24.05.2022, 14:09
Viţină cu Ucraina aputrusită di askerili ruse şi ea işişi străxinda, tru ma puţăn di trei secole, 12 di invazii ruseşti, România easti, di tora, nicukirlu a unui grup di alumtă al NATO, garanţie suplimentară a securitatillei a llei.
NATO va s-apăra cathi ţemntimetru ditu teritoriul a văsiliiloru membre şi iţi atacă contra a unăllei diu eale easti ună atacă contra a tutulor — nu dănăsiră s’facă timbihi lidirllii a Alianţăllei, după ţi, tru 24 di şcurtu, prezidintulu rus, Vladimir Putin, diadi cumandu a askerillei a lui s-atacă Ucraina.
Nică ditu 2014, cându Moscova arăki, paranomu, hamunisia ucraineană Crimeea şi u andrpă rebeliunea secesionistă ditu Donbass, NATO ş’thimilliusi protili ahtări grupuri di alumtă tru patru văsilii di pi Flancul Nord-Estic: Estonia, Letonia, Lituania și Polonia. Aesti structuri – cunuscute și sum numa di “prezență avansată anvărtuşită” — agiumsiră acutotalui operaționale tru 2017, iara la eali llia parti tu aestu kiro aproapea 5.000 di militari ditu Europa, Statele Unite și Canada, cari s’alăxescu la catthi şasi meşi. Tora, după ţi Rusia nkisi diznău cu minduerli belicoase şi expansioniste, aliaţlli apufusiră şi thimilliusirea a grupurlor di alumtă ditu Bulgaria, România, Slovacia și Ungaria. Misiunea prinţipală a aluştor grupuri, adrati ditu militari cari eara duşi ma ninti tru zone di conflictu, easti aţea ti discurajari a iţi eventual agresor.
“Sunt forți multinaționali robuste, ndreapti di alumtă, cari dimonstreadză putearia a ligăturăllei transatlantiţe. Aesta faţi parte ditu nai ma maria anvărtuşeari a apărarillei colective a Alianțăllei ditu aţelu dit soni bărnu” – sumlinie NATO.
Grupul ditu România, cari ari Franța ndrept națiune-cadru, s’constituie, ahurhinda cu meslu mai, pritu alăxearea a elementelor multinaționale aliate ditu cadrul a Forțăllei di Apandisi a NATO, arădăpsiti aoa – dimăndă şi ministerul a Apărarillei di la Bucureşti.
Batalionlu francez disvărtitu tru România, lugursiti kipita di săghită a Forţăllei cu Nivel di Reacţie Multu Analtu al NATO, va s’ndreagă grupul di alumtă di pe teritoriul național, integrânda, pi arada, efective ali Belgie și a Țărilor di Nghiosu. Forțele armate franceze suntu prezente tru România di pi 26 şcurtu 2022. Franța lu avea cumandulu a batalionului di alertă al Forțăllei di reacție rapidă a NATO disvărtitu tru regim di ananghi după atacarea a Ucrainăllei di cătră Rusia. Ditu aestu batalion faţi, parte și ună companie di infanterie belgiană. Franța va s’dizvărtească tru România şi un ditașamentu di apărari antiaeriană tru Centrul Național di Instruire tră Apărari Antiaeriană ditu Caplu Midia.
Tuti aasti unităț suplimentari, spun analiştilli di politică externă, reprezintă apandisea a aliaţilor la pretenţiile ali Rusie di turnari la situația strategică di năinti di 1997, cându fostili stati-satelit ale Uniunii Sovietică, comunizati cu zorea după aţelu ditu soni polimu mondial, aleapsiră, unăoară ţi dictaturli cădzură, s’hibă ună cu lumea libiră apărată di NATO.
Autoru: Bogdan Matei
Armânipsearia: Taşcu Lala
