Flancul ditu apirită, tru mengă
România sarădăpseaşti anamisa di văsiliili tru cari Comisia Europeană poati screască capacitatea di producţie tru industria di apărari.
Mihai Pelin, 13.04.2023, 14:01
15 companii ditu 11 văsilii, ntră cari şi România, fură aflati, ca hiinda irbapi s’poată s’nkisească producţia tru industria di apărari. Aaesta tru condiţiile tru cari UE ari un plan tru trei sturi tră s’da ali Ucraina armament. Un miliard di euro va s’ducă către făvriţli cari au tu aestu kiro armament pi stoc. Un altu miliard va s’agiungă atea turlie ca uzinele di băruti să-şi znuească stocurile. Treilu sturu lu-reprezintă turlia tru cari poate shibă criscută capacitatea a făvriţloru europene, ţi suntu pi lucru. Uzinele româneşti suntu anamisa di ateali cari va s’poată s’agiută ti căftarea di băruti ditu Ucraina, ama au ananghi di investiţii. Aestă easti ună di furñiili tră cari comisarul european tră piaţă internă, Thierry Breton, vini tru România, iu fu aştiptatu di oficialităţi importante a statului. După andamasea cu premierul Nicolae Ciucă, comisarul european declară că pistipseaşti că România va s’poată s’aibă un rol nica ma importantu tru industria di apărari europeană şi cundille că ahărdzindalui 2,5% ditu PIB tră apărari tru aestu an spuni că Bucureștiul akicăsi că him tu ună economie di polimu, iara aesti hărgi comuni agiută ti protecţia a llei, ama şi a Europei. El cundille că, avânda tu videală că Uniunea Europeană s-lo borgea s’agiută gaeretea ali Ucraină ta si s’apăra contra a fuvirsearillei ali Rusiei, lipseaşti s’nă asiguripsimu că avem capacitatea ta s’dămu echipamentele şi bărutea di cari aesta ari ananghi, nica şi pritu criştearea a capacităţilor di producţie la nivel european.
Tu arada a lui, premierul Nicolae Ciucă spusi că anvărtuşearea ali industrie di apărari va s’agiută inclusiv la ună ma bună rezilienţă şi va u crească capacitatea României ta s’ţănă keptu dinintea a problemelor yinitoari.După ţi fu aştiptatu di oficiali di la Bucureşti, dimnitarlu european dusi s’veadă dauă ditu făvriţli ali industriei di apărari, filiale ali Romarm – principalul furnizor di tehnică și servicii militari ditu România, prezent tru pisti 50 di păzări ditu Europa, America, Asia și Africa. Tru aestu kiro, Romarm mindueaşti sli znuească făvriţli di armament, ică pritu parteneriate cu companii private, ică pritu finanţări di la UE. La București, tut tru aesti dzăli easti vinitu şi prezidintulu a Comitetlui Militar al NATO, amiralu Rob Bauer, tră convorbiri consacrate ti catandisea di securitate ditu regiunea ali Amarea Lae, misiunilor aliate di discurajari şi apărari a spaţiului euroatlantic, ama şi a evenimentelor majore di instruire ditu aestu an. El feaţi muabeti cu ministrul di externe Bogdan Aurescu ti pregătirea a summit-ului di la Vilnius ditu alunaru şi implementarea a apofasiloru ditu andamasea aliată di Madrid, iara la sediul MApN avu convorbiri cu ministrul di resort, Angel Tîlvăr, şi cu şeful a Statlui Major, gheneralul Daniel Petrescu. NATO arămâne tră România sturlu di thimelliu a politicăllei di securitate, diclara Daniel Petrescu. El nica spusi că Armata României u faţi totna cama cu hăiri capacitatea ata s’da apandisi ntrăoară iruşi şi cu hăiri la fuvirseri. România spusi că easti didicată Alianţăllei nică ditu prima dzuuă ali adirari a llei la NATO, di scoasi tu vidială aşecă akicăseaşti alithea valoari a apărarillei colective, cundille, tu arada a lui, amiralu Rob Bauer.
Autoru: Mihai Pelin
Armânipsearia: Taşcu Lala
