Fărtuna vărtoasă di Bucureşti
Capitala a Româniillei fu, marţă, kiro di aproapea dauă săhăţ, sumu incidința a născăntoru avertizări di codu aroșu și portocaliu di kiro slabu. Bucureștiul fu aguditu di ploi torențiale di 40 - 50 di litri/mp, kiritlu bătu niacumtinatu, vimtul bătu cu...
Leyla Cheamil, 15.06.2022, 18:58
Fenomene meteo extreme s-feaţiră, marță, București.
Capitala a Româniillei fu, marţă, kiro di aproapea dauă săhăţ, sumu incidința a născăntoru avertizări di codu aroșu și portocaliu di kiro slabu. Bucureștiul fu aguditu di ploi torențiale di 40 – 50 di litri/mp, kiritlu bătu niacumtinatu, vimtul bătu cu vărtuşeami și, tru ma multe zone, diadi grindină di dimensiuni di mesi şi ñiţ. Apa nică geadiili, casi, staţii di metrou şi pasaje rutiere. Furnizorul di servicii di apă şi canalizare tră municipiul Bucureşti feati intervenţie cu aproapea 50 di utilaje şi cama di 100 di lucrători aclo iu s-adună apă multă. Tutunăoară, vimtul surpă dzăţ di cupaci, care cădzură pi carosabil şi autoturisme.
Fenomenele meteo extreme ambudyiusiră şi traficlu feroviar. Circulaţia feroviară fu dănăsită, aproapea di Bucureşti, di itia a niscăntoru arburi cădzuţ pi linia di contact, kiro tru cari ma multe trenuri aştipta s-intră tru staţia Bucureşti Nord.
Tutunăoară, fu minti traficul aerian. Trei curse aeriene programate s’aterizeadză, marță după-prăndzu, la Aeroportul Otopeni fură redirecţionate cătă aeroporturile di Craiova, Timişoara şi tru Sărbie, la Belgrad, di itia a fărtunăllei. Tru idyiulu kiro, ună cursă Tarom di la Bergamo programată s’aterizeadză la ora 17:00 fu anănghisită s’facă survol, neise pănă agiumsiră cama buni condiţiilor meteo tră aterizari.
Fenomene meteo di idyea turlie s-nregistrară şi tru ma multi localităţ ditu giudiţili Ilfov şi Giurgiu. Tru perioada ditu soni meteorologilli pitricură alerte locale di di kiro slabu, ploiuri torenţiale, fărtuñi şi grindină tru ma multe zone ditu văsilie. Multi localităț fură zñiipsiti. Hiri electriţi arupti di vimtu adusiră piriclliulu ti aprindiari la stâlkilli di electricitate, cupacilli surpaţ di furtună ambudyiusiră urdinarea rutieră, kiro tru cari nicukirati şi avlii fură nicati di itia a ploiurloru torenţiale. Tru tuti aeste catandisi, fu ananghi di intervenţia pompierilor militari, a drumarilor şi a voluntarilor.
Reprezentanţălli a Inspectoratului tră Situaţii di Urgenţă aduc aminti abănătorloru că, dma s’aproaki hăbări di turlia RO-ALERT di kiro slabu, lipseaşti să s;apănghisească tru un locu sigura, s’ncllidă uşili şi firidzli a casillei, iara, ma s’hibă tru locuri dişcllisi, să s’afirească di elementele cari pot s’pliguiască, neise cum suntu stâlkilli, cupacilli, panourile publiţitare ică elementele ornamentale a clădirilor.
Di la ahurhita a meslui cirişaru, meteorologilli apufusiră şi ma multi avertizări nowcasting. Elli spun că meşlli cirişaru și mailu adusiră unu numiru cabaia mari di ună ahtari făţeari timbihi. Specialiștii exighisescu că ma multă căldură tru sistemul climatic asociată cu ună cantitate ma mari di umezeală aducu tu migdani fenomene meteo serti spetifiţi aluştoru condiții.
Autoru: Leyla Cheamil
Armânipsearea: Taşcu Lala
