Estul a Europăllei, sum umbrela NATO
Premierlu ali Belgie feaţi vizită la baza aeriană NATO ditu sud-estul a Româniillei iu suntu arădăpsiţ militari ditu văsilia a lui.
Ştefan Stoica, 14.04.2022, 21:16
300 di militari belgieni fac parti ditu forţa di apandisi a NATO, activată di Consiliul Nord-Atlantic pi 25 di şcurtu, ună ş-ună după polimlu declanşat di Rusia contra ali Ucraina. Elli andrupără, tru marţu, aţelli 500 di camaradz francezi, ţi eara duşi la Baza 57 Aeriană Mihail Kogălniceanu, ditu sud-estul a Româniillei. Easti locul pi cari ălu vizită, ñiercuri, prim-ministrul a Regatlui ali Belgie, Alexandir Di Croo. Mesajul dimăndatu a askirladzloru fu susto şi fără echivoc: elli suntu aclo tră s’apăra lumea liberă şi valorle a llei di ună eventuală agresiune vinită di la Apirită.
Alexander Di Croo: Tru aestă bază, trupile franceze şi belgiene acţioneadză diadunu tră s’discurajeadza iţi agresiune la adresa a Româniillei şi a alăntoru state ditu NATO, diadunu cu aliaţllii ditu alanti stati. S’hibă limbidu tră Putin şi pareia a lui: aliaţllii sunt ascumbusiţ. Ună atacă contra a unlui di noi easti ună atacă contra a tutuloru. Tră mulţă oamiñi easti un kiro incertu, ama tru momente ca aeastea easti ghini să știm că putem s’avemu besă pi dumnillili a voastri. Nu hiţ maş un simbol a solidaritatillei a noastre. Prezenţa a voastră easti un mesaj libidu tră lumea di iuţido că va nă apărămu libertatea, dimocraţia, iara lumea liberă nu va s’preda vărnăoară”.
Bănămu un kiro greu pi cari nu pistipseamu că va lu-bănămu tru secolul 21, declară premierul român, Nicolae Ciucă, aţelu cari eara deadunu cu omologul belgian. Ciucă zbură ti ananghea tră thimilliusearea şi anvărtuşearea a unei posturi di apărare şi discurajare hăirlătică tru flancul estic al NATO, tru contextul a fuvirsearillei reale ditu partea ali Rusiei şi cundille că aliaţllii lipseaşti s’hibă ndrepţă ti ună criză pi lungu kiro şi tră situaţia tru cari aestă criză va s’tindă ma aproapea di sinurlu NATO. Prezidintulu a Româniillei, Klaus Iohannis, salută prezenţa a militarlor belgieni tru baza aeriană di la Mihail Kogălniceanu, deadunu cu alantă militari ditu cadrul Alianţăllei.
Klaus Iohannis: Haristusescu a tutuloru aliaţlor a noştri tră prezenţa tru România deadunu cu noi. Di itia că himu deadunu tu aestă bază militară easti ună yilipseari ma multu a adunarillei stogu, coeziunillei şi solidaritatillei cari easti la nivelul NATO. După cum apufusimu la aţelu ditu soni summit di la Bruxelles, va s’dămu silă ti alăxearea a Alianţăllei tră s’anvărtuşimu semtea di discurajare şi apărare a NATO, maxusu pi flancul estic şi la Amarea Lae. Cilăstăsimu tră operaţionalizarea cât ma ntrăoară a aţiloru patru năi grupuri di alumtă, ditu cari unu va s’hibă tru România”.
Ditaşamentul belgian şi aţelu francez ditu cadrul a forţăllei di apandisi a NATO ascumbusescu, deadunu cu contingentul american şi aţelu olandiz, trupile terestre aliate arădăpsiti tru aestă oară tru baza di la Mihail Kogălniceanu. Aclo suntu nica şi ditaşamente ditu Marea Britanie, Italia si România, cari efectueadză misiuni di poliţie aeriană anvărtuşită sumu cumandu NATO.
Autor: Stefan Stoica
Armânipsearia: Taşcu Lala
