Embargo parţial tră nafta arusească
Liderllii UE sakicăsiră, Bruxelles, scurmă, progresiv, importurli di naftă ditu Rusia
Leyla Cheamil, 31.05.2022, 20:01
Di anda ankisi, tru 24 di şcurtu, aputrusearea militară rusă tru Ucraina, statele occidintale căftară, ca apandisi, un şingiru di sancțiuni economiţi și misuri diplomatiţi ti Moscova. Sancțiunile au scupolu s’contracariadză, hăirlăticu, acțiunile aliştei ta s’ducă ninti agresiunea contra a statlui viţinu. Andămusiţ, luni și marță, la summit-ul di Bruxelles, lidirllii a Uniunillei Europene s’akicăsiră, după ma multi oari di muabeţ, s’curmă, progresiv, importurli di naftă ditu Rusia. Compromisul păzărăpsitu până tru oara ditu soni la summitul di Bruxelles nu da izini, toradioară, livrărli di naftă pi amari, nu şi pi ateali pritu conducte, dupu opoziţia ali Ungarie. Misura easti parte a şasillei pachetă di sancţiuni europene di la diclanșarea a crizăllei ruso-ucrainene. Prezidintulu a Consiliul European, Charles Michel, spusi că aestă ñicurari, cari va s’hibă băgată tru lucru până tu inşita a anlui, “anvăleaşti ună ş-ună cama di dauă cirecuri ditu importurile di naftă ditu Rusia, tăllinda unu izvuru babageanu di finanţare ti makina a llei di polimuˮ şi bagă ună “presie maximăˮ contra ali Moscovă, atea turlie că aesta s’dănăsească polimlu.
Importurile prin tungilu Drujba, cari aprovizioneadză şi Ungaria, va s’hibă scutate, tru ună protă hopă, atea ţi diadi izini ali Budapestă să s’llia ndreptul di veto cari ambudyiusea, di ndauă stămâni, adoptarea a şasillei pachetă di sancţiuni al UE la adresa ali Rusie. Consumlu intern ali Ungarie, cari nu ari ieşeare la amare, ţăni, tru un procent di 65%, di nafta purtată pritu tungilu Drujba. Uidisitu cu Palatului Elysée, embargoulu preayalea-ayalea ali UE va s’facă, iniţial, la nafta purtată pi cale maritimă, neise nsimneadză 2/3 ditu achiziţiile europene di naftă arusească. Va s’aibă negocieri, cât ma ayoñea posibil, tră s’curmă artimaia a importurilor di naftă ditu Rusia. Prezent la summit-ul di la Bruxelles, șeflu a statlui român, Klaus Iohannis, diclară că Bucureștiul andrupaşti naua pachetă di sancţiuni contra ali Moscovă.
Di altă parte, lidirlli a Uniunillei Europene s’akicăsiră s’elimină, ditu sistemul SWIFT, trei băntă ruseşti, ntră cari nai ma marea bancă, Sberbank, şi s’nu da izni ti alti trei societăţi di radiodifuziune di stat aruseşti. Până tora, şapti bănţă ruseşti fură private di acces la Swift, ună platformă di mesagerie securizată ţi da izini ti operaţiuni extrem di importante, cum suntu ordinili di transfer di fonduri anamisa di bănţă. Tutunăoară, fu aprobat ună pachetă di asistenţă macro-financiară tru valoare di nauă miliardi di euro. Aești păradz va s’da izini a guvernului di la Kiev ta ş-anvălească ună ş-ună anănghiserli tu numerar, ts’clleamă ta s’lucreadză economia. Autorităţli ucrainene ş-feaţiră isapea ti anănghiserli la ţinţi miliardi di dolari tru mesu. Finanţarea europeană va s’aibă turlia a născăntoru împărmuturi pi lungu kiro, cu tocuri subvenţionati.
Autoru: Leyla Cheamil
Armânipsearea: Taşcu Lala
