Dzuua Națională, sărbăturisită cu Radio România
Ti 1 andreu, tuti posturile ali Societati Română di Radiodifuziune fură tru sărbătoare – programe intearactive, interviuri di excepție, reportaje didicate a marilleai sărbători, muzică românească.
![Dzuua Națională, sărbăturisită cu Radio România Dzuua Națională, sărbăturisită cu Radio România](https://www.rri.ro/wp-content/uploads/2023/10/radio-romania-foto-alexandru-dolea.png)
România Internațional, 02.12.2022, 10:17
Campania “Amintatu tru România”, difuzată dzuua tută pi tuti postuli Radio România, adusiră dinintea-a voastră excelența. Putut s’aascultaţ oamiñi cari aduc tiñie a văsiliillei, reprezentanță a năului bărnu di profesioniști tru economie, muzică, arte, sport, bană și responsabilitate socială, ş-nu maş.
Regizoarea şi scenarista română Eva Pervolovici, cari băneadză Paris, s-amintă tru 1984 Bucureşti. Studie regie di film la UNATC, deapoa feaţi un masterat la Edituburgh, la Screen Academy Scotland, după cari absolvi Paris La Fémis (Ecole Nationale Supérieure dis Métiearas di l’Image et du Son). Aţelu ditu soni documentar a llei, «Delta a Bucureştiului», fu premiat tru 2021 la Eastern Europe Intearanational Movie Awards. Kiro di 7 ani Eva Pervolovici organiză rezidenţe di creaţie audiovizuală la Slon, tru județul Prahova, iu adună cineaşti ditu România şi ditu lume, tru casa-obiect creată di afendi a llei, artistul vizual Romelo Piaravolovici.
Fostu funcţionar public tru Guvernul ditu Marea Britanie (lucră tră Ministearlu Transporturilor, tră atelu di Externe ică di Finanţe), membru tru ma multi fundaţii şi organizaţii, tru aestu kiro consultant politic tră ună companie globală americană şi politician local la Londra (fu aleptu, tru 2022, consilier local tru districtul londonez Hammersmith şi Fulham), Adrian Paşcu-Tulbure easti absolvent di Literatură Engleză, format la prestigioasa Univearasitate britanică Cambridge. Amintatu la Piatra Neamț tru 1988, românul bănă maş 3 ani tru căsăbălu di la poalele a muntilui Pietricica, după cari s-mută deadunu cu părinţălli tru Regatul Unit. Ti ş-aduţi aminti ditu ficiurami?
Dinu Mihăilescu easti un pianistu român ditu Elveţia. Amintatu la Timişoara, tru 1988, tru ună familie di muzicieni, studie muzica la Geneva. Tru august 2022 tinirul pianist yinea diznău tru România natală tră s’ţănă un concertu tră irine la Memorialul Victimelor Comunismului şi al Rezistenţei ditu Sighetu Marmaţiei. El cilastăsi atumtea tru cadrul a grupului Oxy More ditu cari faţi parte deadunu cu un alt pianistu româno-elveţian, Philippe Boaron. Stabilit ditu 2009 tru Elveţia, Dinu Mihăilescu easti — anamisa di altele – amintătoru a loclui al doilea al Concursului internațional di pian «Béla Bartók» ditu Szeged (Ungaria), tru 2017.
Aoa şi 10 ani, soprana Andrada Maria Paşcu thimilliusea Londra, deadunu cu nicukirlu a llei, şi el muzician, percuţionist, Florin Constantin Paşcu, AB MUSIC Academy, inclusă recent di site-ul threebestrated.co.uk, tru un top 3 a tailor nai ma bune şcoli private di muzică ditu capitala britanică. Aţelli doi nicukiri cântă deadunu şi tru trupa Arta Duo, tru aest format scoasiră ndauă ploaci cu colindi di Crăciun şi au programate concerte tru meslu andreu tru Marea Britanie. Cu studii di canto şi pian la Universitatea ditu Oradea, ma multu la căndăsearea a nicukirlui a llei, ama şi a suricăllei a llei, românca s’ngrăpsea aoa şi 13 ani la un masterat la ţelebra Royal Academy of Music ditu Londra.
Paul Hittera easti un pictor român amintatu tru 1982. Studie arte vizuale la București și München. Activitatea a lui artistică includi expoziții perasonale și di grup tru văsilie și tru xinătati, di exemplu tru Cehia, Franţa şi SUA. Andreapsi coperte di CD ică afișe di concertu tră Gogol Bordillo, Rromani Music Awards Belgradi, Rona Hartneara și Fanfara Ciocârlia. Fondator al curentului artistic «Expresionismul balcanic», Hittera abordiadză tu amprotusa teme sociale, mituri populare ditu Balcani, folclor, legendi și mitologii urbane. Lu andămusimu la expoziţia retrospectivă dişcllisă aproapea a dzuuăllei a lui di amintari.
Ana Ștefania Andronic (Buzu) easti artistă vizuală, absolventă a Univearasitatillei Naționale di Arte ditu București, secția Grafică, promoția 2004, iu lu avu profesor căndăsitoru Mircea Dumitrescu. Membră a Uniunillei Artiștilor Plastiţ ditu România ditu 2014, Ana Ștefania Andronic easti fondatoarea ali Galerie Fără Numă. Easti hillea a llirtatlui ziarist şi caricaturist Octavian Andronic.
Autoru: Udălu a hăbărloru
Armânipsearea: Taşcu Lala