Diznău ti dosarlu Schengen
Ministrul austriac di Interne, Gerhard Karner, spuni, București, că România easti pi calea bună, ama că nica ari cali lungă până sintră tru Schengen.
Roxana Vasile, 27.04.2023, 20:08
Austria easti unu di aţelli nai ma importanță investitori xeñi ditu România, cu investiții totale estimate, tru 2021, la piosti 12 miliardi di euro. Easti, ama, isa, isa cratlu golu membru ali Uniuni Europeană canda contra ti adirarea a Româniillei la spațiul Schengen di libiră urdinari a persoanelor și a părmătiiloru, lucru ti niachicăseari la București și Bruxelles. La atelu ditu soni Consiliu JAI a miniștrilor di Justiție și di Interne ditu andreu anlu ţi tricu, reprezentantul a Vienăllei s-ncuntră ti intrarea ali Românie tru Schengen, ignorândalui rapoartele ţi suntu nica ditu 2011 uidisitu cu cari văsilia tiñiseaşti tuti condițiile tehniţi ta s’hibă parti ditu clublu a statelor fără controale la yimbruki. Minduită “regretabilă şi niantimilleată” – spusi, atumţea, prezidentulu Klaus Iohannis.
Comisarlu european tră Afaceri Interne, dna Ylva Johansson, cundille că amintarea aderarillei ali Românie și Vărgărie la Schengen va s’armână ună prioritate a lui şi că easti apufusită s’amintă lucrul aestu tru 2023. Iara șefa a Comisiillei Europene, Ursula von der Leyen, şi prezidentulu a Consiliului, Charles Michel, cundilleară că s’aşteaptă la progrese. Tru vizită, ţi u feaţi stămâna aesta, ñiercuri, București, ministrul austriac di Interne, Gerhard Karner, aspulbiră iţi cali di nădie: România feaţi progrese multu importante tru alumta contra a migraţiillei paranom, ama ari nica cali lungă până la ună protecţie hăirlătică a sinurloru externe ali Uniuni Europene — spusi aestu. Aderarea la spaţiul Schengen nu easti maş un deziderat, easti un ndreptu – vini apandisea ditu partea a omologlui Lucian Bodi, uidisitu cu cari nu easti hirescu ca România să-şi llia maş borgi, fără si s’hărsească di ndrepturli cari ălli si cadu.
Lucian Bodi : “Alli dimăndaiu a domnului ministru că proţesul di aderare a Româniillei la spaţiul Schengen lipseaşti să s’bitisească tru anlu 2023. Pritu turlia tru cari s-amintă idheea europeană di spaţiu fără controale la sinurli interne, aderarea la Schengen nu easti maş un dezidearat ali Românie, ama easti un ndreptu apufusitu pritu tratatili tră tuti statele membre. Tru aţea ţi mutreaşti apofasili loati adză, ambărţitămu un plan di lucru tră prevenirea migraţiillei paranomu şi simnămu trei documenti di cooperari.”
Acordurli simnati Bucureşti mutrescu alumta contra a călăuzilor şi a abuzlui la azil, catacum şi un plan di lucru comun tră combaterea a migraţiillei paranomu pi ruta est-mediteraneană, cari pruveadi, anamisa di di altili, pitriţearea a niscăntoru lucrători di poliţie ditu România la ministerlu federal di Interne austriac ică pitriţearea a niscăntoru lucrători austrieţ la Nădlac, la sinurlu româno-ungaru.
Autoru: Roxana Vasile
Armânipsearia: Taşcu Lala
