Diverghenţi mutrinda plafonarea a păhadzloru la energhie
Naua ordonanţă pi energhie a guvernului di Bucureşti aduţi critiţ.
Ştefan Stoica, 06.09.2022, 12:30
Păhălu a gazelor naturale alină, luni, tru Europa, cu 30%, după ţi Rusia dimăndă că livrările pritu gazoductul Nord Stream armân dănăsiti pi kiro nispus. La Amsterdam, iu s’apufusescu păhadzlli di referinţă tră gazlu natural pe continent, cotaţiile ansăriră di 270 di euro tră un megawatt-oră. Tru primăveară, după aputrusearea arusă tru Ucraina, eali avea agiumtă pi livelu record di 335 di euro tră un megawatt, aducu aminti agenţiile di presă.
Uniunea Europeană analizeadză ma multe opţiuni tră băgarea a unei limită di păhă la energhie. Tru capu cu Germania, cari dimăndă ună pachetă di 65 di miliardi di euro, guvernili europene apufusescu s’pompeadză păradz mulţă tru scheme di andrupari a nicukiratiloru.
Idyealu lucreadză şi executivul di coaliţie di Bucureşti, cari apufusi s’prilundzească schema di plafonare şi compensare a facturilor la gaze şi curent după data di 31 marţu, până tru meslu agustu a anlui yinitoru. Ună nauă filozofie mută, ama, ună parte ditu fortuma financiară a aluştoru misuri di la bugetlu a statlui tru borgea a companiilor ditu energhie, a curi va lă si bagă supraimpozitarea. Ma multu, intermediarllii cari va s’vindă şi iara va s’vindă energhie la păhadz multu mări, ufilisinda-si aşi, tru opinia a guvernanţilor, di criza energetică, va s’hibă amendaţ cu 5% ditu ţifra di afaceri.
Prezidintulu ali Asociaţie Energhiei Inteligente, Dumitru Chisăliţă, lugurseaşti că vadilu di implementari a ordonanţăllei guvernamentală adoptată stămâna ţi tricu easti multu şcurtu şi poati s’aducă greali cutulburări tru lucurlu a consumatorlor non-casniţ.
Dumitru Chisăliţă: “Majoritatea a consumatorlor industriali, nica şi aţelli casniţ, ş’adrară un planning, ş’adrară niscănti bugete, s-apufusiră născănti contracte. S’yiñi tora mesea di agiocu, s’yiñi tora ninti di kirolu di iarnă, s’dai pisti cap tuti aesti elemente, ditu a mea vidială, va s’bagă mulţă consumatori tru curmu şi va-lli aducă tru catandisea tra să-şi ñicureadză activitatea ică să s’ncllidă”.
Fostul ministru al energhiei, Răzvan Nicolescu, susţine, tru schimb, că noile măsuri pot reduce specula.
Răzvan Nicolescu: “Căbilea ti sancţionareaa cu 5% ditu ţifra di afaceri tră aţelli cari tranzacţioneadză energia cu scupo speculativ, tra s’crească facturli atumţea cându s’duc s’diconteadză, easte un lucru bun. Faptul că după mulţă meşi di dzăli s’mindueaşti tra s’află ună cearei tră consumul propriu tehnologic, la distribuţie şi la transport, iara, ditu a mea vidială, easte un lucru bun. Faptul că s’bagă principiul ca tuţ aţelli cari fac profituri nintimilleati tru aestu kiro s’hibă taxaţ easte un lucru bun.”
Uniunea Salvaţi România, di opoziţie, cutugursi ordonanţa pe energhie, di itia că va lu aspargă sectorlu energetic şi economia. USR easti la a treia cilăstăseari ti dimitere a ministrului di resortu Virgil Popescu pritu moţiune simplă, document pi cari lu-ari dipusă nica tru ahuhrhita a sesiunille parlamentară.
Autoru: Stefan Stoica
Armânipsearea: Taşcu Lala
