Dispri mpărmuturi și misuri sociale
Guvernul di București aprobă misuri, tra sagiută româñilli cari au probleme financiare.
Leyla Cheamil, 28.07.2022, 16:28
Românii cari au probleme cu păradzlli va s’poată să-și amână ratele bancari, după ţi Guvernul di la București aprobă, ñiercuri, normele tra Ordonanţa di urgenţă cari pruveadi aeastă posibilitate. Pot s’aibă hăiri di aestă misură maş persoanili fiziţi ţi nu au rate restante şi ateali juridiţi cari dimonstreadză că avură trucasări cu nai ma puţăn 25% ma ñiţ andicra di anlu ţi tricu.
Perioada tra cari s’da facilităţile di suspendare şi amânare la plată a ratilor s’apufuseaşti pi thimellilu a opţiunillei dibitorlui şi easti anamisa di unu şi nauă meşi. Atelli cari contractară mpărmuturi tru cadrul a programilor “Prima Casă” şi “Noua Casă” pot s’apeleadză la aestă reglementare, cara împrumuturli lă si diadiră anlu aestu, până la 30 apriliu.
Suspendarea s’faţi pi thimellilu a unei diclaraţii pi a lui răspundire pitricută a instituţiilor financiare, iara atelli cari acceseadză aestă hălati nu va s’hibă penalizaţ. Cu tuti aestea, misura di amânare a ratelor, aprobată di Guvern, poati s’ahibă unu meru nfărmăcatu. Şi ministrul di Finanţe, Adrian Câciu, şi analiştilli economiţ fac urminie ti păltearea di cu kiro împrumuturlor, cu căftarea di triţeari la un tocu fixu.
Adrian Câciu adusi aminti că, tu bitisita, beneficiarlli a misurăllei va s’lipsească s’păltească ratele cari fură amânate, cum și dobânda adunată. Di ţiva kiro, indiţili ROBOR la trei meşi, ufilisitu tru isapea a custusearillei cu mpărmuturli di consum tru lei cu dobândă variabilă, tut creaște, ti lăhtara a aţiloru cari au mpărmuturi. Niercuri, agiumsi la 7,71% tru anu! Un nivel ma mari fu nregistrat tru mai 2010, dimecu 7,81%. Şi indicele la şase meşi, ufilisitu tru isapea a tocurloru la mpărmuturile ipotecari tru lei cu dobândă variabilă, criscu la 7,83% pi an.
Di altă parte, tra s’agiută populația vulnerabilizată di inflaţia galopantă, Guvernul di la Bucureşti da carduri minduiti s’l-agiută a aţiloru cu amintatiţi ñiţ s’ancupără alimente di mari ananghi. Ministerul a Investiţiilor şi Proiectelor Europene dimandă că, până la bitisita a săptămânăllei, tuti ateali două milioane şi giumitate di carduri tra agiutorul social tru valoare di 250 di lei (circa 50 di euro) va s’hibă ampărţăti di Poşta Română. Suma di 250 di lei s’da unăoară la doi meşi, până tru meslu andreu, pritu programlu “Agiutoru tra România”. Cardurile sunt valabile 12 meşi di la data ancărcărillei a lor.
Una ditru categoriile nai ma vulnerabile u reprezintă pensionarllii. Emu, ministrul Finanțelor, Adrian Câciu, dimăndă că pensiile va s’crească tru ahuhrita a anlui yinitoru. Tu arada a lui, prezidintulu PSD, Marcel Ciolacu, spusi că armăni ti vidiari disi va s’hibă criscuti tuti pensiile ică maş atelli cu amintatiţi ñiţ şi di mesi. Uidisitu cu ministerlu a Lucurlui, numirlu total a pensionarilor era, tru bitisita a meslui marţu, di piste 4.800.000.
Autoru: Leyla Cheamil
Armânipsearia: Taşcu Lala
