Demisia-a ministrului și căvgălu ditu azile
Ministrul român a Lucărlui, social-democratlu Marius Budăi, dimisionă dupu căvgălu mutrinda casili tră auşi
România Internațional, 14.07.2023, 18:46
Ca ună consecință a căvgălui mutrindalui araua yitripseari ţi lă si făţea a auşloru și a persoaniloru vulnearabile tru azile, ministrul român a Lucărlui, social-democratlu Marius Budăi, ș-deadi, demisia, acă, aoa şi ndauă dzăli, spunea că aestu gest nu angreacă. Viţepremierlu Marian Neacşu va s’hibă ministru interimar, iara izvuri politiţi spunu că yinitorul ministru al Lucărlui va s’hibă număsitu di PSD (la co-guvernare), stămâna yinitoare, cându va s’hibă organizată ună andamasi di lucru a cumăndusearillei aliştei partie.
Apofasea ti demisie fu dimăndată di premierul social-democrat Marcel Ciolacu, uidisitu cu cari aestu gest easti normal tru ună democraţie. “Avui ună muabeti cu domnul ministru a Lucărlui, Marius Budăi, cari ăñi deadi hăbarea ti apofasea tra s’dipună demisia la bitisita aliştei andamasi di lucru. Ditu videala-a mea, easti un gest di nămuzi tră cari îlli haristusescu şi escu căndăsitu că aesta easti reacţia di arada a unui decidentu politic tru ună ahtari criză. Easti reacţia di arada tu iti democraţie anvărtuşită a Europălleiˮ.
Spunerli yilipsiră, atumţea, că pisti 100 di ași-dzăşi beneficiari a aluştoru ţentri eara fuvirsiţ, făţea foamiti, trăñipsiţ și privaţ di condiţii minime di igienă. Tru aestu kiro, autoritățli duc ma largu acţiunea di verificari la nivel naţional a ţentrilor soţiale rezidenţiale. Tru dzălili ditu soni, fură verificate ma multi ahtări cămine. Ditu aestea, pisti 20 fură ncllisi, majoritatea Bucureşti.
Tutunăoară fu curmatu lucurlu la aproapea 30 di ţentre şi fură dati amendză tru valoare di aproapea 10 milioane di lei (dimi 2 miliuñi di euro). Fură adrati ma multi dosari penale, ditu cari ună parti mutrescu infracţiuni contra a persoanăllei şi di turlie economică. Tru idyiulu kiro, fură ţănuţ şi doi inspectori ali Agenţie Giudeţeană tră Plăţ şi Inspecţie Socială Ilfov, tră aţea că nu feaţiră isapea uidisită ti catandisea ditu un ţentru di mutreari a persoanelor cu dizabilităţ.
Premierlu Marcel Ciolacu căftă ali suţiitati ţivilă s’pripună năi numi tră yinitoarea cumănduseari ali Autoritati Naţională tră Persoanele cu Dizabilităţi, di itia că lugurseaşti că ONG-urile suntu nai ma axiziti s’prezintă persoani irbapi tru aestă dumeni. Tu arada a lui, partidul di opoziție Uniunea Salvați România caftă organizarea-a unei sesiuni parlamentare extraordinară, tră ună analiză a catandisillei ditu ţentrili suţiali.
Autoru: Leyla Cheamil
Armânipsearea: Taşcu Lala
