Declaraţii ti Dzuua-a Europăllei
Pi 9 di Mai, ti dzuua a Europăllei, ti valorli europeani!
Roxana Vasile, 10.05.2023, 14:26
Yiurtusearea di estan nă află tu un kiro di ahăndoasă alăxeari pi livelu global, iara consecinţele a polimlui Fedearaţillei Ruse contra Ucrainei s-multiplicară – declară, tru mesajlu a lui cu furñia a Dzuuăllei ali Europă, pi 9 di Mai, prezidentulu ali Românie, Klaus Iohannis. Uidisitu cu aestu, ceareili europene la provocărli actuale suntu cearei ti yinitorlu a cetăţeañilor continentului, iara România ari axia ta s’agiută cabaia mutu, ma largu ti băgarea tu lucru.
România easti un membru matur şi responsabil ali Uniunii Europene, ari un profil european vărtosu şi credibil, pricunuscut şi apreciat di partenerllii a llei – cundille Klaus Iohannis. Și tut el şi spusi pistipsearea că, interiorizândalui aesti repere, agiutorlu a cetăţeañilor români tră Uniunea Europeană şi tră valorli a llei fundamentale va s’armână di niminari.
Strasbourg, andămusitu tru sesiune plenară, Parlamentul European yiurtusi, și el, Dzuua a Europăllei. Călisitu s’lă părăstisească a eurodeputaţlor vizia a lui mutrindalui provocărli şi yinitorlu a bitărnului continent, canţelarlu ghirman, Olaf Scholz, a curi văsilie băgă thimeallili tru ahurhita a aniloru ʹ50, ti atea ţi vrea s’agiungă Uniunea Europeană, căndăsi bloclu comunitar s’ahurhească reformarea, s’nu da cali a zorillei şi s’armână un partener isa tru plan geopolitic emu tu ligătura cu Statele Unite ali Americă, emu tru competiţia cu China.
Şi, di itia că tru viţinata ali Uniuni s’faţi un polimu di fuvirseari cari alăxi bana a oamiñiloru, prezidenta ali Comisie Europeană, Ursula von der Leyen, u nsimnă Dzuua a Europăllei pritu ună vizită ţi u feaţi Kiev. Furñie tră șefa a Executivlui european să spună că Ucraina easti loclu nai ma uidisitu ta s’yiurtusească 9 di Mai, căţe ucraineañilli apără dinintea ali Rusie tuti valorli ali democraţie pi cari easti thimilliusită Uniunea Europeană. Emu, tu minduita a llei, Rusia eşuă tru planlu a llei, di itia că nu acăţă tu isapi aesti valori. Ma multu, Rusia easti, tora, tru praglu tra s’hibă sum presia economică pritu 11-a pachetă di sancţiuni cari va u slăghească aftukinata di polimu ali Moscova – adăvgă Ursula von der Leyen. Cari apăndăsi, ama, cu ngătanu la căftarea a prezidentului Volodimir Zelenski ti urgentare a păzărăpserloru di adearari ali Ucraină la Uniune.
Prezidentulu Zelenski haristusi a statilor europene tră agiutorlu militar, economic şi politic ţi ăli fu dat. Să spusi, alliumtrea, multu nvirinatu ti niscănti văsilii di la sinuru cari ambudyiusiră (România feaţi excepție), tru kirolu di ma ninti, exportul di yipturi ieftine, fără taxi di yimbruki, ali Ucraină. Năsu declară că akicăseaşti că aesti exporturi dusiră la dezechilibre, ama spuni că Ucraina ari ananghi di solidaritatea a tutăloru aţiloru cari pot s-u-agiută.
Autoru: Roxana Vasile
Armânipsearia: Taşcu Lala
