COVID-19, trendu discriscătoru
Numirul di cazuri năi di Covid-19 easti tru scădeari tru România, ama prusupida di protecție armâne ună hălati hăirlătică ti nilăndzidzari.
Mihai Pelin, 17.08.2022, 15:05
Autorităţli di București dimăndă ună tendinţă di scădeari a numirlui di cazuri năi di Covid-19. Secretarlu di stat tru Ministerul Sănătatillei, yeaturlu epidemiolog Adriana Pistol, cundille că, stămâna tricută, eara nregistrate aproapea 39.000 di năi lăndzidzări, cu 13.000 ma puţăni andicra di intervalu di ma ninti. Tendinţa di scădeari a infectărlor cu coronavirus easti evidentă tru aestă oară, iara aesta va să s’veadă, nai probabil, și ma limbidu tru stămâñili ţi yinu, cara va s’armănă tru idyea scară, spuni Adriana Pistol:
“Tru stămâna preţedentă, 8-14 di agustu, numirlu easti cama scădzut andicra di săptămâna di ma ninti. Dimi, s’veadi aestă tendinţă di discrişteari. Idyiulu lucru lu videmu şi tru aţea ţi mutreaşti numirlu a decesilor, fură niheama ma puţăni andicra di stămâna anterioară. Toradioară, nu nă aştiptăm la fenomene ahoryea neise maxutarcu, ama cu turnarea ditu vacanţe şi ahurhearea a şcollurilor putem s’agiundzemu, diznău la ună creastire a numirului di cazuri.”
Până meslu ţi yini, cându elevllii s’toarnă la cursuri, prusupida di protecţie armâne ună hălati hăirlătică ti niklăndzidzari, nica spusi secretarlu di stat tru Ministerul Sănătatillei. Adriana Pistol: “Multi ori vidzui şi tru născănti aftukinati di transportu, şi tru supermarketuri persoane cari purtară prusupida; lă haristusimu şi dămu curayiu ca la cathi timbihi a noastră s’facă idyiulu lucru. Am căndăsearea că aestu purtaticu agiută, şi el, ună turlie cabaia multu la aestă tendinţă di scădeare şi aplatizare a numirlui di cazuri, tră aţea că, hiinda zborlu ti ună lăngoari cu transmiteare aerogenă, aesti sunt metodile pritu cari putem s’evităm lăndzidzarea, ama maxus putem s’evităm şi lăndzidzarea alăntoru di ninga noi.”
Marță eara dimăndati 3.600 di cazuri năi di Covid tru 24 di săhăţ, tru scădeari anidicra di aoa şi ună stămână, kiro tru cari tru spitalili ditu văsilia tută eara internaţ aproapea 4.000 di pacienţ tru secții cu COVID-19. Autoritățli spun că Omicron easti preponderentă anamisa di lumăkili cari fură secvenţiate şi aflati tru stămâna preţedentă. BA2 easti tru un proţentu di 39%, iar lumakea BA5 agiumsi la un procent di 16%. Năpoi aduţemu aminti că, pe 9 di marţu, restricţiile băgati tru contextul ali pandimie di COVID-19 fură scoasi. Ministrul român ali Sănătati, Alexandru Rafila, spunea, atumţea, că ufilisearea a prusupidăllei di protecţie emu tru locărli di nafoară, emu şi tru ateali di năuntru numata easti obligatorie. Ma multu, la intrarea tru văsilie, nu mata s’ari căftată certificatul COVID şi certificatul di localizare a călătorilor. România fu tru catandisi di alertă sanitară kiro di aproapea doi ani.
Până tru aestu kiro, simfunu cu datili ofiţiali, fură confirmate nai ma puţănu 3,1 milioane di cazuri di infectare cu SARS-CoV-2 și pisti 66 di ñilli di dicese asociate COVID-19, maxusu tru arada a persoanilor cu ilikia di pisti 60 di añi.
Autoru: Mihai Pelin
Armânipsearia: Taşcu Lala
