Coordonari europeană tru criza ucraineană
Prezidentulu a Româniillei, Klaus Iohannis, dimăndă că prota cărvani uminitară cătră Ucraina va sbagă tu practico tu yinitoarili dzăli.
Leyla Cheamil, 09.03.2022, 19:46
Agresiunea militară a Rusiillei contra Ucrainăllei ascumbusi statele europene s’ndreagă şi s’bagă tu practico misuri mutrinda kivernisearea a situațiillei actuală provocată di aestă criză. Tru aestă noimă, marță, s’tănu ună andamasi di coordonare tru format vidioconferinţă cu prezidentulu a Consiliului European, Charles Michel, la cari lo parti și șeful statlui român, Klaus Iohannis. La videoconferința ndreaptă cu scupolu ti ndridzeari ună reuniuni informală a Consiliului European ti gioi şi viniri, nica loară parte premierlu a Ţărilor di Nghios — Mark Rutte, aţelu ali Gărţie – Kyriakos Mitsotakis, ali Croaţie – Andrej Plenkovic şi ali Estonie – Kaja Kallas.
Discuţiile avură tu amprotusa kivernisearea şi agiutorlu a fluxurlor di arifugaţ şi misurli di asistenţă uminitară tră Ucraina şi Ripublica Moldova, aesta ditu soni ampulisinda-si cu ună dalgă di arifugaţ ucraineni. Tutunăoară, feaţiră muabeti ti anvărtuşearea-a dimensiunillei di apărare a Uniunillei Europene, securitatea energhetică, cu accţentu pi ñicurarea a dependenţilor, diversificarea aprovizionarillei şi aflarea cearei tru plan european la criştearea a păhadzloru la energie.
Prezidentulu Klaus Iohannis părăstisi misurli nkisiti di România tru agiutorlu ali Ucraină viţină. Ntră aestea s’arădăpsescu apofasea ta s’hibă nicukira a unlui ţentru logistic tră coordonarea şi colectarea asistenţăllei umanitară internaţională ti Ucraina şi Ripublica Moldova, cari easti, tora cătră Ucraina va s’hibă ndreptu tu yinitoarili dzăli. Klaus Iohannis cundille, tutunăoară, susţănearea a Româniillei tru aţea ţi mutreaşti căftărli di aderari ali Ucraina, Ripublica Moldova şi Georgia la Uniunea Europeană.
Tu ţi mutreaşti securitatea energetică, prezidentulu Iohannis adusi aminti ti misurli pi kiro di mesi şi lungu cari mutreascu dănăsearea-a dependenţăllei di Rusia şi diversificarea-a izvurloru di aprovizionare cu energie. Şeflu a statlui românu yilipsi rolu ti asiguripsearea a interconectărlor la nivelu a statelor membre şi cundille tu aestă noimă, anamisa di Grecia şi Bulgaria şi ufilisearea a gazoductului BRUA. Nu dip tu soni, el cundille importanţa ti valorificarea cât ma bună a potenţialului combustibililor di tranziţie tră asigurarea securitatillei energhetiţi.
Klaus Iohannis adusi tu muabeti și situaţia păhadzlor la energie, cari armâne un subiect prioritar ditu perspectiva impactului tră populaţie, ama şi a economiilor tru ansamblu a lor, hiinda ananghi ti idintificarea a născăntoru cearei la nivel european cari s’veaglle consumatorul. Di altă parte, el susţănu ananghea ti anvărtuşearea-a sectorlui di apărare la nivel european şi dimăndă apofasea a Bucureștiului ta s’crească hărgili tru sectorul di apărare la 2,5% ditu Produsul Intern Brut, di di anlu ţi yini.
Autor: Leyla Cheamil
Armânipsearia: Taşcu Lala
