Cooperari româno-bavareză
România şi landul Bavaria vor să-şi anvărtuşeadză ligăturli bilaterali.
Tașcu Lala, 14.02.2023, 13:28
Ligăturli economiţi, politiţi şi culturale, cum şi ndruparea tră aderarea a Româniillei la spaţiul Schengen di libiră circulaţie eara tru menga ali vizita la Bucureşti a prim-ministrului landului Bavaria, Markus Söder. Alăxerli comerciale anamisa di România şi vărtoslu landu ghirmabu s-aprukeară, anlu ţi tricu, di 7 miliardi di euro.
Premierlu Nicolae Ciucă lugurseaşti că părţăli pot s’exploreadză năi domenii di coopiarare cum easti iţrăllia artificială, digitalizarea, industria alimentară ică agricultura. Şeflu a guvernului di Bucureşti aagiumsi pi isapia, că Bucureştiul poati s’aibă besă pi ndruparea ali Bavarie tra s’agiungă la scupolu ti aderarea la Schengem, ratat, nica nă oară, anlu tricutu, di itia a opoziţiillei ali Austrie. Markus Söder spusi că va s’cil4stăsească s’li curămă reticenţele a oficialilor di la Viena.
Markus Söder: Noi ndrupămu România pi calea a llei ti aderarea la Spaţiul Schengen. Easti multu important ca noi, tru Europa, s’akicăsimu că, aoa, avânda tu videală catastisea cu Ucraina şi cu Rusia, provocărli suntu neise pi ltu livelu; şi nu lipseaşti s’nă dukimu profesori, că lipseaşti s’nă ndrupămu unu alantu şi s’nă tiñisimu. Vidzumu gaereţli şi progresili cari s’feaţiră şi tră Europa vrea s’hibă ghini. Nu himu membri di clasa ntăñea şi clasa a daua. Himu tuţ deadunu şi lipseaşti s’nă ndrupămu şi va s’avemu hăiri maş car ava nă ndrupămu, emu nu altă turlie”.
Prim-ministrul ali Bavarie lu asiguripsi şi prezidentulu Klaus Iohannis ti ndruparea a landului a lui tru dosarlu Schengen. Şeflu a statlui cundille ligăturli politiţi, economiţi şi culturali niacumtinati anamisa di România şi Bavaria şi lunga a lor adeti. El salută simnarea di cătră prim-ministrul ali Românie şi prim-ministrul ali Bavarie ti Declaraţia mutrinda anvărtuşearea a ligăturloru bilatearali, cari pruveadi şi ahurhearea diznău a lucărlui la Comisia Mixtă Guvernamentală România-Bavaria tru aestu an, la Munchen.
Markus Söder năpoi adusi aminti sinferlu tră duţearea ma largu a investiţiilor tru economia ali Românie, capitol la cari landul Bavaria easti, pi ningă comerţi, pi protlu loc abamisa di landurile ghimane. Părţăli vor s’dizvolte cooperarea tru domeniul energiillei regenearabile şi ali tranziţie veardi şi lu spusiră sinferlu ta s’lucreadză tru domenii di kipită, catacum sectorlu digital, inteligenţă artificială, biomedicină.
Aţelli doi analţă oficiali fură simfuñi că un important rol di catalizator a dialoglui anamisa di ateali dauă văsilii lu-ari minoritatea ghimană ditu România, ditu cari işiş prezidentulu Klaus Iohannis faţi parte şi di româñilli cari ş-feaţiră nicukirată tru Ghirmania. Uidisitu cu prim-ministrului Markus Söder, tru landul Bavaria băneadză nai ma marea comunitate di cetăţeni români ditu Germania, iara aesta yilipseaşti ună paradigmă di integrare şi minteari activă tru bana suţială şi culturală. Prezidentulu ali Românie şi prim-ministrul ali Bavarie avură şi ună alăxeari di opinii mutrinda catandisea di securitate şi năpoi spusiră andrupămintulu tră Ucraina ţi easti stuhinată di un an cu ataca arusească.
Autoru: Stefan Stoica
Armânipsearea: Taşcu Lala
