Conţertu românescu la Viena
2023 easti “Anlu cultural Dimitrie Cantemir și Ciprian Porumbescu, tră celebrarea a banăllei și operăllei cărturarlui Dimitrie Cantemir și a operăllei compozitorlui Ciprian Porumbescu.
Corina Cristea, 31.07.2023, 16:24
Eveniment di excepție, duminică seara, tru cunuscuta sală Musikverein ditu Viena – Opera Naţională Bucureşti ţănu un concertu tru premieră, tră tiñia a marilui compozitor și avyiulistu român Ciprian Porumbescu, tru condiţiile tru cari 2023 fu declarat anlu aluştui muzician. S-umplu tru aestu kiro, 170 di ani di la amintari şi 140 di ani di la moartea a compozitorlui. Sala di malămă ditu cari televiziunile ditu tută lumea transmit pi 1 di yinaru Concertul di Anlu Nou ditu capitala ali Austrie arăsună, tora, di armoniile românești. Programlu a spectacolului avu tru aradă tru exclusivitate lucrări simnate di Ciprian Porumbescu, ndziminănda spiritualitatea cu tradiţia şi muzica sacră cu aţea di inspiraţie folclorică: “Crai Nou” – prima operetă românească, “Balada”, “Rapsodia Română” şi “Tatăl Nostru”. Interpretarea fu simnată di soliştii, corlu şi orchestra Operei Naţionale ditu Bucureşti, dirijor Daniel Jinga, iara oaspiţ di tiñie aliştei seară eara maestrul Gheorghe Zamfir şi solista Maria Coman.
Daniel Jinga “Tră mini, andamasea cu muzica al Ciprian Porumbescu nsimnă ună revelaţie. Aveam, cadealihea, ună păreari contrafaptă ti atea ţi nsimneadză marşurile ditu opereta “Crai Nou”. Era idyealui cu propaganda comunistă. Tru aestă oară s’faţi ună exorcizare di comunism al Ciprian Porumbescu şi minduescu că, di aoa şi nclo, lipseaşti s’himu nădioşi s’aprukemu aestă muzică tru forma a llei pură, tru forma tru cari Ciprian Porumbescu u mindui cu multu kiro ninti ca România s’treacă pritu aestu experimentu totalitar.”
Marea vreari al Ciprian Porumbescu eara s’adară ună operetă izvurâtă ditu folclor, atea ţi şi aprăftăsi, opereta “Crai Nou” agiungănda un reper ali muzică românească ditu secolu al XIX-lea. Creaţia al Porumbescu reinterpreteadză un mit popular cari spuni că Luna Nauă (Craiul Nou) poati s’aducă haraua ti aţelli ţi s’arisescu. Subiectul fu priloatu ditu mediul a hoarăllei moldovenească, iara acţiunea s’faţi tru 1851, avânda la thimelliu ună veaclle leghendă populară ce ari tru ea ună pirmituseari di ariseari ţi iasi tu videală cu tuti keadiţli di nafoară. Ti aestă operetă să spuni că ndzimineadză buna dispoziţie cu verva poetică şi reveria, tru ună atmosferă autentic românească, tonică, adrată di ună muzică simplă şi caldă. “Akicăsearea a operetăllei “Crai Nou” rezidă tru andamasea anamisa di ţi easti originar şi ţi easti original. Capodopera al Ciprian Porumbescu yilipseaşti ună ligătură vărtoasă tru fondul ancestral a spiritualitatillei româneşti, ama easti şi ună creaţie orighinală, aducânda deadunu veclliulu şi naua exprimare muzicală a timpului a lui”, spune Daniel Jinga. Aţeali 2.000 di locuri ditu sala vieneză fură acăţati di români ditu diaspora, cari bătură pălñili ncicioari reprezentația, cu mări entipusi pi elli ama şi pirifañe.
Autoru: Corina Cristea
Armânipsearea: Taşcu Lala
