Cllimari tră calea europeană a Ripublicăllei Moldova
Prezidenta a Ripublicăllei Moldova, Maia Sandu, dimăndă ascumbusearea, tru 21 di mai, Chişinău, a unăllei adunari populară cari syilipsească minduita pro-europeană a cetăţeañilor ditu ñiclu cratu românofon.
Roxana Vasile, 11.04.2023, 18:30
Prezidenta-a Ripublicăllei Moldova, Maia Sandu, lă căftă a compatrioțlor a llei s’iasă, tru 21 di mai, tru Piaţa Marillei Adunari Naţională di Chişinău, tra s’ndrupască imnaticlu european ti cari ş-lo borgi ñiclu cratu ţi ari sum 3 miliuñî di bănători, nai ma oarfănu di pi bitărnulu continentu. Ea feaţi aestă cllimari tru contextul a minduerloru di destabilizare ali Rusie cari u stuhină ripublica ex-sovietică tru meşlli ditu soni – di la protesti pi geadei păltiti di aţelli ţi ndrupăscu Moscova, la mindueri ti surpari a guvernarillei pro-europeană, denunţati di Chişinău.
Prezidenta Maia Sandu: “Niscănţă nica ş-bagă ntribarea desi populu a nostru u va cadealithea aderarea la Uniunea Europeană. Vă căndăsescu să spunemu, tu catandisea di populu, apofasea limbidă ta s’himu parti a fumeallillei europeană, ţi ari la thimelliu tiñia, stabilitatea şi colaborarea economică. Vă căndăsescu să spunemu că maş noi himu nicukirlu a aluştui locu neise populu ali Ripublica Moldova. Vă căndăsescu s’lă exighisimu a aţiloru ţi suntu pi dauă, că apofasili mutrinda yinitorlu ali Ripublica Moldova s’llia tru Ripublica Moldova.”
Maia Sandu zbură ndreptu şi tră formaţiuñili pro-ruse di Chişinău, pi cari li stipsi că s-ufilisescu di polimlu ditu Ucraina viţină cu minduita tra s-aspargă văsilia işiş şi tra s’amintă putearea: “Păradzlli măryiţ cari finanţeadză minduerli di distabilizari niacumtinati cură. Ari oamiñi fără minti tru Moldova cari mutrescu ţi s’faţi tru Ucraina şi s’hărsescu di crimili di aclo, cari vedu fănicadzlli ditu Bahmut, Bucea, Mariupol, Herson şi spun că a lor suntu aproapea. Aeşti oamiñi cari ş-vindură văsilia suntu hăzări, tora s’veadă horli şi căsăbadzlli a noşţă s’hibă arnisiţ di pi locu, maş tra s’yină elli la puteari.”
Neise, pritu loarea parti la adunarea ditu 21 di mai, maxus număsită Moldova Europeană, prezidenta Maia Sandu ş-căndăseaşti compatrioțllii să spună a lumillei că suntu europeni şi că aesta easti calea aleaptă di elli. Călisitu la Radio România, profesorlu universitar Dan Dungaciu, directorlu a Institutlui di Ştiinţe Politice şi Relaţii Internaţionale ali Academie Română, feaţi isapi ti cllimarea a prezidentăllei a Ripublicăllei Moldova: “Tru Republica Moldova nu ari partidi politiţi, ari partidi geopolitiţi. Aţea falie easti zori s’hibă anvălită di ună mari manifestari naţională, baş ună organizată di un ditu aţelli nai ma populari ică nai ma popular prezidentu, vahi, ali Ripublică Moldova – doamna Maia Sandu. Dimi, ca iniţiativă, easti un lucru tiñisitu şi ti ndrupari. Ma s’aprăftăsească, cadelihea, s’ducă Republica Moldova pi calea cătă Ascăpitată, cari ţi s’hibă ţiclurli politiţi, aesta easti ună luyurie pi cari lipseaşti s-u videmu.” Tru aestu kiro, nica spune profesorul Dan Dungaciu, nai ma şcurtă cale di integrare europeană a Ripublicăllei Moldova armâne România, cari (alidzemu) “va s’hibă, tu cathi aradă, atea ţi lli-armăni ali Ripublică Moldova când ălli si llia tuti.”
Autoru: Roxana Vasile
Armânipsearea: Taşcu Lala
