Căftări tru agiutorlu a agricultorilor ditu România

Guvernul di la București caftă agiutorlu ali Comisiei Europene tra sagiuta agricultorllii zñiipsiţ di xerea extremă

Warning: Trying to access array offset on null in /home/web/rri.ro/public/wp-content/themes/rri/template-parts/content.php on line 98
Leyla Cheamil, 26.07.2022, 17:21

Culturile agricole ditu România cădzură pradă, tru aestu an, a xerillei fără precedint cari faţi ravagii, iara agricultorllii ahuhriră să-şi facă isapea ti kirerli, cu frixea că numata va ş-llia păradzlli pi cari 4lli investiră. Nai ma mărli probleme sunt tru sudul și tru estul a văsiliillei, iu rezervele di apă sunt extrem di ñiţ. Fermierllii ditu născănti zone căftară a autorităților locale s’facă dimersurile ţi suntu ananghi tra s’apufusească catandisea di calamitate tru agricultură. Tra să-lli agiută pi fermierllii zñiipsiţ di xeri, Guvernul di la București căftă ali Comisie Europene aprobarea tra s’da unu avans anamisa di 70 şi 85% ditu plăţile directe tra misurile di mediu şi climă ditu Programul Naţional di Dizvoltare Rurală 2014-2022. Tru idyiulu kiro, Executivul va tra s’da a pomicultorilor şi viticultorilor, ama şi a crescătorilor di porţă şi pulli agiutoari di 51,6 milioane di euro, ditu cari 25,5 milioane di euro ditu fonduri europene, iara alanţă di la bugetlu naţional, dimăndă Ministerlu ali Agricultură. Ma multu, s-pruvidzură investiţii tru sisteme locale di irigaţii ditu fonduri UE, tru valoare di 100 milioane euro, prin Planul Naţional Strategic 2023-2027. Uidisitu cu datili centralizate di aestă instituţie, xerea asparsi pănă tru aestă oară, aproapea 107 ñilli di ictări di suprafaţă agricolă ditu 20 di judiţe ali Românie.

Di itia a xerillei, Dunărea agiumsi la un nivel minim, luni tahina. Dibitlu a fluviului la intrarea tru văsilie fu di maş 1.950 metri cubi pe secundă, cu multu sumu media multianuală normală ditu aestă perioadă di 2.500 metri cubi pi secundă. Hidrologilli feaţiră timbihi că, tru tut kirolu a aliştei stămână, dibitlu va s’hibă tru scădiari, până la valoarea di 1.850 metri cubi tru secundă. Di itia că scădzu nivelulu a apilor ali Dunării, tru judiţul Dolj, neise, s’nregistreadză ună catandisi fără preţedint tru aeştă 70 di ani ditu soni: culturile agricole numata potu s’hibă udati cu apă ditu fluviu. Aesta după ţi nivelu a Dunărăllii scădzu cu 7 cm tru ună dzuuă. Prezidintulu ali Asociaţie Fermierilor ditu România, Daniel Botănoiu, faţi timbihi că xerea extremă aduţi zñie a producţiilor agricole ali văsilie ditu aest an, ama va s’aibă impact şi ti yinitorlu anu agricol, tra atea că lucrările numata va s’poată s’hibă executate tru oara ananghi şi di calitate. Neise, el lugurseaşti că sistemul di irigaţii liseaşti s’hibă uidisitu cu năili tehnologii cari s’aibă hăiri maximă tra plante, ama lipseaşti s’hibă ufilisiti şi soiuri di plante tolerante la xeri.

Tru kirolu anda agricultorlli s’ampulisescu cu xerea, niţi hăbărli di la meteorologi nu suntu mplini di curayiu. Xerea easti maş ahurhita, va s’yină kiro nica ma laiu, faţi timbihhi prezidintulu ali Societati Meteorologice Române, Ion Sandu, cari easti di păreari că autoritățli lipseaşti s’llia misuri tra perioadili yinitoari.

Autoru: Leyla Cheamil

Armânipsearia: Taşcu Lala