Avertismente MAE tră Rusia
MAE năpoi lă aduţi aminti a cetăţenilor români urminia a lui susta tra sfugă, cât cama ayoñea, ditu teritoriul ali Fediaraţie Rusă.
Roxana Vasile, 29.09.2022, 15:18
Rusia s’ndreadzi s’alikească aţeali patru regiuni ditu sudlu ali Ucraină -Zaporojie, Herson, Lugansk şi Doneţk – tru cari fură organizate pseudo-referendumuri pritu cari majoritatea a bănătorlor votară alikearea la Fedirație. Ufilisinda diznău retorica tră sa-și justifica ofensiva tru Ucraina, Rusia spuni că bănătorlli a aluştoru regiuni nu avea altă alternativă, tru condițiile tru cari Kievul ghio taha andridzea reprimarea populaţiei rusofone ditu Ucraina. “Ghini vinit acasă, tru Rusia!” — gri hărăcop fostul prezidintu rus, Dmitri Medvediv, tru aestu kiro viţeprezidintu a Consiliului di Securitate al Rusie.
Kievul şi aproape tută comunitate internaţională nu dănăsiră cu cutugurserli ti aşi-dzăsili referendumuri, imagini şi mărtirii di la faţa locului spunanda că fu ascumbusită askerea rusă tră sa-lli intimidiadza şi s’bagă zori s’voteadză pi localniţ. Oficialităţ di Moscova spusiră că, unăoară alikiti teritorii cari reprezintă aproapea15% ditu suprafaţa Ucrainei, Rusia poati s’ufilisească tră apărarea lor inclusiv armi nucleare. Ună sfinduki ali Pandoră cari, unăoară dişcllisă, va s’hibă multu zorlea, cara nu imposibil di ancllidiari!
România condamn4 și ea, nica ună oară, tru zboară naima serti referendumurile ilegale şi ilegitime ditu perioada 23-27 yism4ciuni ditu regiunile aputrusiti paranom di askerili ruse tru Ucraina și dimanda că nu pricunoaşte rezultatele a lor. MAE român cundilleadză că aesti simulacre di consultare populară reprezintă ună călcari gravă a ndreptului internaţional şi, ti aesta, nu produc niţi ună turlie di efectu juridic. Ministerul român nnca spuni că, prit organizarea aşi-dzăsilor referendumuri, Rusia dimonstrează, nica na oara, că li călcă principiile fundamentale ale ndreptului internaţional şi că acţionează contrar responsabilităţilor cari îlli si cadu ca membru permanent a Consiliului di Securitate al ONU. Bucureștiul napoi lu spuni agiutorlu susta tră indipendinţa, suveranitatea şi integritatea teritorială ale Ucrainei şi faţi apel cătră tute statele s’nu aprioaki minduerli ali Rusiei tra s’alikească paranom teritorii a altui stat ică iţi turlie di acţiuni similare.
Tru paralel, tru contextul evoluţiilor a kirolui ditu soni ditu Rusia, inclusiv di itia a hăbarillei mutrinda mobilizarea parţială, Ministerul di Externe reitereadză cu insistenţă urminiili fapti, a românilor tra s’nu nkisească tru călătorii neesenţiale pi teritoriul arusescu, iara a aţiloru cari suntu temporar aclo s’acaţă tru isapi fudzearea di aclo căt cama ntrăoară. Totodată, MAE lă faţi urminie a cetăţenilor români prezenţă tru Rusia s’aibă ngătanu, s’nu s’ducă tru locurile iu ari adunări publice ică călbălăki mari di oamiñi şi s’nu llia parti la eventuale acţiuni di protest. Tru aestu kiro, polimlu nkisitu di Rusia s’pari că intră tru ună nauă logică, nica ma di piriclliu, unăoară cu aţeali ditu soni explozii la gazoductele ditu Marea Baltică Nord Stream 1 şi 2, calificate di europeni ca hiinda lui sabotaj.
Autoru: Roxana Vasile
Armânipsearea: Taşcu Lala
