Atacă arusească la Gurli a Dunăllei
Polimlu nkisitu di aruşi tru Ucraina agiumsi multu aproapea di România.
Bogdan Matei, 25.07.2023, 19:00
Ministerlu ali Apărari di la Bucureşti cundilleadză că, tru aestă oară, nu ari ună fuvirseari militară directă la adresa a teritoriului naţional ică a apilor teritoriale ale Românie. Şi ministrul di Externe, Luminiţa Odobescu, declară că, tru aestu kiro, România, ca membru NATO şi ali Uniuni Europeană, ari nai ma importante şi ma vărtoasi garanţii di securitate ditu tută istoria a llei. Ea avu ună muabeti telefonică cu secretarlu di stat american, Antony Blinken, deadunu cu cari condamnă atacurile fapti tora ma ninti di Moscovei contra a ţivililor ditu Ucraina şi tru infrastructura fluviale şi maritime, catacum şi turlia cinicătru cari Federaţia Rusă zñiipseasti securitatea alimentară globală.
Dclaraţiile s’fac după ţi ună atacă arusească cu droni agudi ună infrastructură portuară ucraineană tru reghiunea Odesa şi asparsi un hangar cu yiptu. Comandamentul operaţional ucrainean ditu sudul a văsiliille spuni că inamicul avu tru scupo maxus porturile ditu partea ucraineană a Dunăllei, lugursiti călliuri alternative ti purtarea di yiptu.
Rușllii agudiră, cama di tamamu, porturile fluviale Ismail și Reni, ditu sudlu ali Basarabie, teritoriu românescu ditu apirită arăkitu di Uniunea Sovietică stalinistă tru 1940, dupu unu ultimatum, și priloatu di Ucraina tru 1991, ca stat clirunomu. Portul Reni, esențial tră purtrea a părmătiilori pi Dunăre, easti la aproape13 kilometri tru linie ndreaptă di căsăbălu românescu Galați. Nai ma pţănu trei drone fură surpati di apărarea antiaeriană di aclo, ama uă a patra agudi ună măyăzie di yiptu.
Și șeful ali administrației a căsăbălui portuar Ismail, Rodion Abașev, confirmă, pi Facebook, ataca cu rachete lansată di Rusia, di itia a curi șase persoane fură pliguiti.
Cu ună săptămână ma ninti, ruşlliidimăndară abandonarea a unlui acord mutrinda exportul di yiptu pritu Amarea Lae, adoptat tru alunaru 2022, sumu egida ONU și cu medierea ali Turchie, ţi deadi izini, acă avea polimu, ti exportul a 33 di milioane di tonuri di produse agricole ucrainene. Uidisitu cu Kievului, cama di 400 di milioane di oameni ditu lumi au ananghi di hrana exportată di ucraineni.
Prezidentulu ali Românie, Klaus Iohannis, condamnă sertu” atacurile armatei ruse di invazie contra ali infrastructură ucrainene civile di pi Dunăre, multu aproapea di România. Aestă escaladare, cari s’feaţi tora ayoñea, spuni un risc salami tru aţea ţi mutreaşti securitatea la Amarea Lae. Tutunăoară, zñiipseaşti tranzitlu a yipturloru ditu Ucraina tru yinitorlu aprukeatu şi, impliţit, securitatea alimentară la nivel global” – ngrăpsi şeflu a statlui român pi Twitter.
Tt București, premierul Marcel Ciolacu declară că agudearea a obiectivelor di infrastructură portuară easti nica ună spuneari a naetillei ali Rusiei ta s’li submineadza exporturile di yipturi ucrainene cătră păzărli globale, lucru ţi destabilizeadză greu securitatea alimentară mondială.
Autoru: Bogdan Matei
Armânipsearea: Taşcu Lala
