Apofasi europeani mutrinda produsili agricoli ucraineani

CE apridună importul a născăntoru produse agricole ditu Ucraina tru statele UE ţi suntu tu sinur cu ea, ntră cari şi România.

Ştefan Stoica, 03.05.2023, 15:11

Comisia Europeană lo misuri preventive excepţionale şi temporare mutrinda importurile a unui numiru limitat di produse ditu Ucraina. Misurli, cundille executivlu comunitar, suntu ananghi avânda tru vidială circumstanţele excepţionale a blocajelor loghistiţi greali cu cari s’ampulisescu ţinţi state membre ale Uniunii: Vărgăria, Ungaria, Polonia, România şi Slovacia. Suntu acăţati tu isapi maş patru produse agricole — gărnu, misuru, rapiţă şi simiţi di floarea soarilui. Misurli s’băgară tu practico di marţă şi va s-ţănă pă tu 5 di cirişaru 2023. Tru aestă perioadă, gărnulu, misurlu, rapiţa şi simiţăli di floarea soarilui orighinare ditu Ucraina pot s’urdină libiru tru tuti statele membre ali Uniunii Europene, ma pţănu ateali ţinţi văsilii adusi aminti, iu importul di yipturi ieftine ucrainene adusiră a fermierilor autohtoni mări chireri. Maş tru România, chirerli a producătorilor suntu di ordinlu a sutilor di miliuñi di euro. Nica şi aşi, autorităţli di Bucureşti nu apufusiră, idyealui cum alanti state europene ditu prota linie, misuri unilaterale catacum nidarea izini a tranzitlui şi a importului di yituri ucrainene.

UIdisitu cu apofasea loată di Comisia Europeană, produsili pot ta s’urdină ma largu ică s’treacă pritu Vărgăria, Ungaria, Polonia, România şi Slovacia cu agiutorlu a unui regim di tranzit di yimbruki comun ică s’agiungă tu ună văsilie ică un teritoriu di nafoara ali UE. Tru paralel, Vărgăria, Ungaria, Polonia şi Slovacia s-loară borgea s’bagă misurli unilaterali tu ligătură cu gărnu, misuru şi simiţi di floarea soarelui şi iţi alti produse cari yinu ditu Ucraina. Tru kirolu anda apăndăsescu la ciăstăserli a fermierilor ditu aţeali state membre viţini cu Ucraina, misurli ndrupăscu angajamentul suto ali Uniunii ta s’agiută Ucraina şi ti prezervari capacităţli a llei ta s’exporta yipturli, cari suntu di simasie, tra s’hărnească lumea şi s’ţănă păhadzlli la alimente scădzute, dinintea a griutăţloru babageani di itia a fuvirsearillei arusă, cundilleadză Comisia Europeană. Aesti misuri fac parte ditu pacheta ghenerală di agiutoru pi cari lu-pripuni Comisia şi va s’hibă completate cu un agiutoru financiar ti fermierllii ditu aţeali ţinţi state membre şi cu misuri suplimentare tra s’licşureadză tranzitlu a exporturlor di yipturi ucrainene pritu călliurli di solidaritate cătă alti state membre UE şi văsilii terţe. Comisia easti ndreaptă s’bagă diznău misuri preventive după expirarea actualui Regulamentu mutrinda misurli comerciale autonome la 5 di cirişaru, ahătu kiro cătu catandisea excepţională neadzi ninti.

Bucureşti, ministrul Agriculturăllei, Petre Daea, spusi că România va s’aproaki aproapea 30 di miliuñi di euro di la Comisia Europeană, ma multu andicra di ateali 10 miliuñi ţi eara dati ma ninti, ta s’ndrupască fermierlli zñiipsiţ di importurli di yipturi ieftine ditu Ucraina. Ministrul fu sertu cutugursitu di opoziţie, cari ălli caftă giueapi căţe nu ciulăstăsi cătu lipsea aţea turlie ca producătorlli românii s’llia păradz compensatorii ditu partea Uniunlleii. Fondurli multu ñîţ ahărdziti tu ahuhrită ti România adusiră niifharistusiri a fermierilor cari căftară un mecanismu real di agiutoru ti agricultori.

Armânipsearea: Taşcu Lala